Shillong, Nailur 15 : U Myntri Rangbah ka Jylla Conrad Kongkal Sangma ha ka sngi palei, ula ong ba ka Tnad Pule Puthi ka dang shong bishar ia ka jingkynnoh halor ki kynrum kynram ha skul Pinemount bad ka Sorkar Jylla ka dang ap ia ka kaiphod ia kane.
Haba iakren bad ki nongthoh khubor, u Conrad ula ong “Ngi ka bthah ia ka Tnad Pule Puthi bad ia u Chief Secretary ban shong bishar ia kane ka kam. Ka dei ka kam kaba sngewkhia khamtam ba ki samla bad ka skul kala mad jingeh”.
Haba pynpaw ia ka jingsngewkhia halor kane ka kam, u Myntri Rangbah ula ong, khlem da kdew kti ne kynnoh iano iano ruh, hynrei u don ia ka jingsngewkhia ia ki Khynnah skul ba pule hangtei.
“Kat kaba dei ban leh na ka bynta ka bha ka miat jongki khynnah skul khamtam ki khynnah ka skul Pinemount, ka Sorkar kan shim beit ia ki sienjam ba donkam halor kane. Hynrei ia kane ka kam la shong bishar bha da ka Tnad Pue Puthi bad kan sa ai jingtip ia ngi shen” ong u Conrad.
Haba kylli ban thung ia ka jingtohkit, u Myntri Rangbah ula ong “..na ki jingshem ba tohkit malu mala, lada ngi shem ba ki don ki sakhi kiba biang ba ka don eiei ka bym beit bad ba hap ban leh eiei, ha kane ka por ngin sa shim ia ka rai”.
Dang shen, ki Nonghikai bad ki Khynnah skul ka Pinemount kila pynlong ia ka jingiakhih ban dawa weng noh ia ka Principal jong ka skul.
