Shillong, Nailur 25 : Ka Senior Men’s Selection Committee ka Meghalaya Cricket Association ka la wan shakhmat ban pynbna ia ki kyrteng ki 15 ngut ki player naka bynta ki lai tylli ki jingiakhun jong ka lympung ialehkai CK Nayudu Trophy U-23 ki shynrang.
Ka samoi ialehkai jong kane ka lympung kan sdang naduh ka 16 tarik u bnai Risaw u ban wan, ha kaba ka jingiakhun ba nyngkong ka Meghalaya kan long pyrshah ia ka Baroda ha la iing bad hadien kane, ka kynhun kan khreh ba kan mih pat na la iing ban leit pat ban iakhun pyrshah ia ka Jammu & Kashmir sha Jammu naduh ka 26 tarik u Risaw bad hadien kane, ka kynhun kan wanphai biang sha la iing ha kaba kin pdiang pat ia ka jingwan ban iakhun ka Goa kaban sdang naduh ka 2 tarik u Naiwieng.
Haba pynbna ia ki kyrteng ki player, kane ka kynhun ka la pyntip ruh shi syndon ia u kapten, kaba ha kane ka kynti ba mynta la rai ban bynshet ha u Kevin Christo katba u Josiah Momin un shimti kum u vice captain.
Haba iadei bad kane, ka jingpynkhreh jong kane ka kynhun la buh ba kan sdang naduh ka 29 tarik mynta u bnai ha Tura kaban iai bteng hduh ka 12 tarik u bnai Risaw.
Na ka liang ki bor pyniaid, ki pyntip ba ka jingialum lang jong baroh ki player Khasi & Jaintia kan dei ha ka step jong ka 28 tarik mynta u bnai ha shwa ba kin mih ban hiar sha Tura, katba kito ki player kiba dei na ri lum Garo, kin hap ban poi ha Tura ha ka 28 tarik mynta u bnai bad hadien kane ka jingialum lang ba shipor, ka kynhun kan sa khreh ban mih lang naka bynta ban leit sha Baroda.
Kyrteng ki player: Purav Agarwal, Manish Sharma, Sudhir Sahani, PM Santosh, Banialam Mylliemngap, Dipankar Baruah (WK), Sachin Kumar (WK), Josiah Momin (VC), Kevin Christopher (C), Gavineal Marpna, Avinash Rai, Shavian Blah, Navin Kr Ray, Asif Khan, Gulgul Sangma
Standbys: Pushkar Raj Singh, Chandra B Thapa, Raghav Magotra, Thunun Marak, Denikcheng Marak
Support staff: Neetesh Sharma (head coach), Marty Mustafa (assistant coach), Emidao Dhar (physio), Skhembor Khongbtep (trainer), Chuba R Marak (manager)
