Shillong, Nailur 25 : Ka National People’s Party – Jowai Block hynne ka sngi Palei kala pynkupbor ia u MLA ka Jowai uba long ruh u Myntri Sorkar ka jylla u Bah Wailadmiki Shylla ha Indoor Sports Hall Cum Auditorium jongka shnong Chutwakhu, Jowai.
U Bah Shylla ula shah pynkup burom ha ka NPYF, Women’s Wing, ka Farmer Front jong ka seng bad kiwei kiwei ki Unit jongka NPP na Jowai Constituency.
U Bah Shylla ula ai khublei ia ki nongkyrshan bad ong ba ka rilum Jaiñtia ka phaikhmat sha ka Jowai Constituency kum ka jhad kaba ialam lynti ia ka thain bad mynta kum u Myntri Sorkar ka don ka jingkyrmen kaba bha ia ki paidbah.
Haba pynkynmaw ia ki jingsahkynmaw ha u snem 2017 ha ka por ba ula sdang ban leit iakynduh ia ki paidbah ban pan ia ka jingkyrshan bad um shim la poi pyrkhat ba un ioh ia ka jingshaniah ka jongki ha ka elekshon MLA 2018 bad u pynpaw ia ka jingsngewnguh namar kila iengskhem bad u wat ha ka elekshon ha u 2023 ruh.
U Bah Shylla ula ong, ban ioh votes na ka Constituency ha ki jaka sor ka long kaba eh bha namar ba ki nongthep vote ki dei kiba don ia ka jingiohi jngai bad u kyrmen ba da ka jingiai pyrshang bad jingtrei shitom yn dang ioh shuh shuh ia ka jingshaniah na ki ha ka elekshon ha u snem 2028.
Mynta ka sngi, bun tylli ki Unit jong ka seng kila pynkup burom ia u Bah Shylla da ka jain Ryndia, ki jingdro bad ki dur ki dar, ki syntiew ki skub katba na ka liang jongka Khimmusniang Unit kala ai da ka sati Ksiar.
