Guwahati, Jylliew 24: Ka National Investigation Agency (NIA) ha ka sngi Nyngkong, kala chargesheet sa ia 8 ngut ki briew halor ka kam khaii tuh ia ki nong Bangladesh bad ki Roghingya lyngba ka khappud Bangladesh.
Ka NIA ha ka chargesheet bynrap bala aiti hynne ka sngi sha Iingkashari, kala jer kyrten gia u Jalil Miah, Hanam Miah, Kajal Sarkar uba dang phet rieh, u Adhir Das bad Anwar Hussain, baroh kiba treikam na Jylla Tripura.
Kiwei pat kiba la shah chargesheet ki dei u Kamai Das uba dang phet rieh, uba dei u para jong u Amol Chandra Das bala dep shah chargesheet, uba treikam na Silchar nalor u Liton Chakraborty uba na West Bengal. Uwei pat u dei u nong Bangladesh ba kyrtengu Rabiy Hasan ba ju khot sin u Rabiul Hassan.
Kat kum ka jingtohkit ka NIA, u Liton Chakraborty ula pynkhreh ia ki kot ki sla India ia ki nong Bangladesh bad soi tuh ruh ia ki kot ki sla ban ioh rung sha India. U Rabiyl Hassan u dei uba don jingiadei ba iajan bha bad ki briew kiba shah kem ha Assam, West Bengal, Tripura, Tamil Nadu bad Karnataka.
Hashuwa kane, ka NIA kala chargesheet pyrshah ia 24 ngut ki nong Bangladesh hapoh ka kyndon IPC, Foreigners Act bad Passport (Entry into India) Act.
