Shillong, Nailar 02 : Ka Meghalaya Lokayukta kala chargesheet ia 12 ngut ki briew kynthup u MLA ba mynta, khyndiat ngut ki dkhot ka Executive Member bad u Secretary ka Garo Hills Autonomous District Council (GHADC) nalor ki arngut ki Contractor halor ka jingbym lah pyndep ban tei ia ka MDC hostel ha Tura, kaba la mang haduh T.6,01,31,100.00.
Ha ka hukum kala pynmih ha ka 28 tarik Naitung, u Chairperson ka Meghalaya Lokayukta Bah B Dkhar ula ong “ La wanrah ia ka case record mynta ka sngi ha ryngkat ka kaiphod jingtohkit bala aiti da u Anil Sangma. MPS (retd), dkhot ka Inquiry Wing ka Meghalaya Lokayukta. Kine ki Nongtrei Sorkar/nongshah mudui kila shah chargesheet kat kum ka kyndn 12 bad 13 jong ka Prevention of Corruption Act, 1988 (kumba la pynkylla)”.
Kine kiba shah chargesheet ki kynthup ia u CEM barim ka GHADC Denang T Sangma bad 8 ngut ki MDC barim ba kynthup ia u Augustine R Marak, Brilliant R Sangma, Dipur R Marak, Kurosh M Marak, Winningson ChM arak, Dolly K Sangma, Bhupen Hajong, Sukaram K Sangma.
Kiwei pat ki kynthup ia u Secretary ka GHADC Hewingson A Sangma bad arngut ki contractors – Sanjay A Sangma bad u Dolrich D Sangma.
Lah ban kdew hangne ba u Sanjay A Sangma u dei u MLA ba mynta jong ka Mahendraganj Constituency.
U Chairperson ka Lokayukta ha ka hukum, ula bthah ia u Director of Prosecution ban phah ia ka case record da ka original sha u Public Prosecutor ka West Garo Hills, Tura ba un rah tian bishar ha ka Iingkashari ba kyrpang jong ka West Garo Hills, Tura.
Lah ban kdew hangne ba ia ka jingujor la mudui da u Kingstone Bolwari Sangma kaba long pyrshah ia u Sanjay A Sangma bad kiwei nalor ka jingbym lah ban tei pyndep ia ka MDC hostel ha Tura kaba la mang haduh T. 6,01,31,100.00.
Ia kane ka song pisa la bei sha kane ka project lyngba ka Special Assistance grant jong ka Sorkar Pdeng na ka bynta u snem 2015-2016 ha kaba la Ministry of Finance kala pyllait T.100.71 klur kum ka Grant-in-Aid sha ka GHADC, ba kan pyntrei ia ki kam pynroi ha ki jaka ba hap hapoh ka Sixth Schedule.
Ka Lokayukta kala pynlong ia ka jingtohkit ba malu mala bad lap baka don ka jingpyndonkam bakla ia ka pisa haba iadei bad ka jingpyn treikam ia kane ka project bad kymta kala rai ban pynlong ia ka jingtohkit kaba bniah.
Ha ka kyrwoh, u Kingstone uba dei u Working President ka Human Rights and Anti-Corruption Youth Power of India, ula pyntip ba ki dkhot ka Inquiry Wing jong ka Lokayukta kila aiti ia ka chargesheet bad ka kaiphod jingtohkit kaba bniah sha ka Iingkashari ba kyrpang ha Tura.
“Ka Iingkashari ba kyrpang, Tura, kala pynmih ia ka hukum ba shimkhia ia kane ka kam bad kala register ia ka case bad kala buh ban tian bishar ia ka ha ka 29 tarik Nailar, 2023” ula ong.
Pule lang ia kane: Maham ka KSU ia ka seng kaikhlaw Karbi-UKFKL ban ym pynthut ia ki Khasi-Pnar
