Shillong, Nailar 02: Ka Khasi Student union (KSU) West Jaintia Hills ka phah ka kyrwoh sha ki paradoh parasnam kiba shong ba sah ha Block I bad ia baroh kiba shong ba sah markhap bad ka Assam ba kim dei ban tieng bad ban shong syier namar ka Seng kan long kaba la kloi ban ai iaka jubab ia kita ki Kaikhlaw kiba thmu ban pyntieng bad iuh roit ia ka hok ka kynti ki paid Khasi kiba don ha Block I.
Kane kadei hadien ka jingmih ha ki kot khubor ba ki don kita ki kynhun kieng atiar kaba tip kum ka United People’s Front Of Karbi Longri (UPFKL) kiba thmu ban pyntieng pynsmiej iaki Khasi-Pnar kiba shong ba sah ha la ki jong ki jaka ki puta kiba don ha Block I.
Ka kyrwoh na u Publicity Secretary KSU WJH u samla Juhhi Tariang ka kdew ba ka Seng ka kyntu ia ki paradoh parasnam ban kin iaid kin ieng kumba ju long baroh shi katta bad ban kamai kajih laitluid hala ka jong ka khyndew lajong.
Ka kyrwoh ka kdew ruh ba ka Seng ka maham ruh ia ka seng kaikhlaw ka UPFKL ba lada ka kwah ban ia tyngkhuh, ka seng ka long kaba la pynkhreh ban ia mih ha madan thma.
“Lada jia ei ei ia ki doh ki snam ki jong ngi kiba shong ha kitei ki jaka, ka sorkar Assam bad ka sorkar Meghalaya ki dei ban shim ka jingkit khlieh” la ong ka kyrwoh.
