Nongstoiñ, Lber 28: Ka West Khasi Hills Fair Price Shop Dealer Association, ka la byrngem ban sangeh ban sei ia u khaw FCI namar ki wholesaler kiba dei ki nongsam ïa u khaw na ki stock sha ki fair Price shop dealer lane ki nongsam khaw ha ki shnong bapher bapher, kim ju pynpoi ïa u khaw shaduh ki jaka sam kumba la bthah da ka sorkar.
La kynnoh ba ki Wholesaler lada ki pynpoi ia ka mar ki dang pan ïa ka bai kali bad ka bai daju, kaba long pyrshah ia ka jingbthah jong ka Sorkar ba dei ban pynpoi ïa u khaw shaduh ki jaka sam khlem da shim bai kali ne bai daju.
Kane ka Synjuk hynne ka sngi Ba-ar, kala pynlong ia ka jingiakynduh lang ha TRYSEM Hall kaba don ha phyllaw ka Ophis u Deputy Commissioner ka Wesr Khasi Hills ban iaphylliew jingmut halor kane ka kam. Ia kane ka jingialang la pyniaid da u President ka Synjuk Grosdingland Tympuiñ ha ka jingiadonlang u bah Joyfulstar Marngar secretary, u bah Iskarland Nongsiej nongaibuit ka synjuk bad kiwei kiwei ki riew rangbah.
Hadien ka jingïatai kaba la slem bha, ka jingïalang ka la phah ïa ki katto katne ngut ki nongïalam ba kin leit ban ïakynduh ïa u Deputy Commissioner ban ïakren halor katei ka mat. Hynrei namar ba u Deputy Commissioner um lait kumta kim shym la ïohlad ban ïakynduh ïa u.
U bah Iskarland Nongsiej nongaibuit ka synjuk haba ïakren bad u nongthoh khubor hadien ba ki la mih na ophis u Deputy Commissioner, u la ong ba ha katei ka jingïalang baroh ki nongsam khaw na man la ki centre, da kawei ka jingmut ki la rai ba lada ki wholesaler kim pynpoi ïa u khaw haduh ki jaka sam kin sangeh ban leit sei haduh ba kin da ïapynbeit da kumwei pat.
Pule lang ia kane: Pyndonkam ka Tnad Pulit da ki kor technology ban tehlakam ia ki nongpynkhein Traffic Rules
