Shillong, Lber 28 : U Symbud Myntri Rangbah ka Jylla ba khmih iaka Tnad kam Pohiing (Police) Bah Prestone Tynsong ula ong ba khnang ban lah tehlakam ia ka kam ba iadei bad ka jingpynkhreh ia ka Traffic Rules hapoh ka Nongbah bad ka Jylla, ka Tnad Pulit kala pynkylla mynta ia ka jingtreikam na ka jingshaniah pura ha ka jingshakri ki Pulit Traffic sha ka jingpyndonkam da ki kor technology.
Ki kor technology baka Tnad kala pyndonkam mynta ki dei ka e-Challan Digital Traffic Salution, kaba pynsted ia ka jingdain kuna ia kiba pynkhein ain bad ka jingbuh ia ki “khmat na suin” ne ‘Eyes in the Sky” lyngba ki drone da ka jingbuh ia ka Drone Control Room ha East Khasi Hills bad West Khasi Hills, kiban khmih ia ka jingiaid kali khamtam ha ki kynta ba thnem ka leit ka wan” ong u Bah Prestone.
U Bah Prestone ula pyntip ia kane haba jubab ia ka call attention notice bala wanrah da u MLA ka Congress na Mylliem Bah Ronnie V Lyngdoh hynne ka sngi Ba-ar ha Iingdorbar Thaw Ain.
Haba pynpaw ia ka jingsngewkhia halor ka jingdheng kali ha Upper Shillong, u Bah Prestone ula ong ba ka jingdheng kali ha kane ka surok ka dei kaba la shah ktah na ka jingpynheh ia ka surok. Hynrei, ka Shillong Traffic Police (STP) kala trei shitom ban pynthikna ia ka jingiaid beit jong ki kali bad ialeh katba lah ban pyllait kloi ia ka jingdheng kali.
Ula pyntip ba ka jingpyniaid ia ki kali na MES Point (Rilbong) sha 7th Mer Upper Shillong ka hap hapoh ka jingkhmih jong ka Lumdiengjri Traffic Branch. Kane ka Traffic Branch ka don uwei u Inspector, 5 ngut ki Sub Inspector, 5 ngut ki Head Constable bad 38 ngut ki Constable.
Ia kine ki Nongtrei ka Traffic Branch la buh ha MES Point (Rilbong), ha lad 3 Mer Upper Shillong bad ha lad 7 Mer Upper Shillong, bad kila sdang trei ia ka kam naduh ka por 7 baje mynstep haduh ka por 9 baje mynmiet, ia kaba la pynjlan ruh ha ki khep ki khep kat kum ka jinglong ka iaid ka ieng ki kali.
Nalor kane, u Symbud Myntri Rangbah ula ong ba nalor ka jingpyniaid ia ki kali ha kine ki 3 tylli ki jaka ba donkam, kine ki Nongtrei ka Lumdiengjri Traffic Branch ki hap khmih ruh ia ka jingpyniaid kali ha kiwei pat ki jaka ba kongsan kiba hap ha u pud u sam jong ka. U pyntip ba kane ka Branch kala ioh ruh ia ka jingiarap jong ka Flying Squad ban pyllait kloi ia ki kali haba don ka jingdheng ne suki ka rukom iaid ki kali.
