Guwahati, Lber 28: Ki heh ka tnat pyniaid Election ka Mizoram kin pynlong ka jingiakynduh ia ki nongialam na Tripura ban pynkloi ha kaba iadei bad ka jingweng ia ki kyrteng jong ki nongthep vote kiba dei na ka jaidbynriew Bru ka Mizoram kiba la leit ban shong ban sah junom sha katei ka jylla ba marjan.
Haba kren sha ki lad pathai khubor, u Joint Chief Electoral Officer ka Mizoram u David Liansanglura Pachau u la pyntip ba ki don ia ka jingthmu ban leit sha Tripura ha u bnai Iaiong u ban wan na ka bynta ban pynlong ka jingiakren bad ki heh ka tnat election ka Tripura khnang ban wad ia ki lad ki lynti kiba thmu ban weng ia ki jingeh jong ki nongthep vote na ka jaidbynriew Bru bad ban pynthikna ban pynkloi ha kaba iadei bad ka jingweng noh ia ki kyrteng jong ki nongthep vote Bru na ka electoral roll ka Mizoram.
Kane ka sienjam ka thmu ban weng noh ia ki jingeh bad ban pynthikna halor ka jingpynkloi ban weng noh ia ka kyrteng jong ki nongthep vote Bru na ka electoral roll ka Mizoram hashwa ka jingpynlong ia ka ilekshon assembly ka ban sa long hajan kaba kut jong une u snem.
“Ka tnat pyniaid election haduh mynta ka la lah ban weng noh ia ki kyrteng jog ki 4,318 ngut ki nongthep vote kiba dei na ka jaidbynriew Bru kiba la leit shong leit sah junom sha ki bynta ba marjan ha Tripura na ka voter list jong ka jylla,” ong u Pachau.
Nalor kata u la ong ruh, “Ngi don ia ka jingthmu ban leit ha ryngkat ki heh ka tnat pyniaid election jong kito ki district kiba don bynta.Ngin rah ryngkat ia ki list jong ki nongthep vote Bru kiba don ha ka electoral roll ka Mizoram bad iamir jingmut lang bad ki heh ka tnat election ka Tripura halor kane ka mat khnang ban lah ban pynkloi ha kaba iadei bad ka jingweng kyrteng.
Namar ka jingsyier na ka jingiaumsnam kaba lah ban mih na ka jingsngew iapher jaidbynriew hadien ka jingshah pyniap u heh ka tnat forest ka Mizoram ha ki lehnoh Bru ha ka snem 1997, da ki hajar ngut ki jaidbynriew Bru ki la phet krad noh sha Tripura hadien katei ka jingjia.Naduh katei ka por ki la don ha ki jaka shong shipor ha Tripura.
U Pachuau u la ong ba kane ka sienjam ban weng kyteng na ka voter list ka la iaid suki haduh katta kata hadien ba kiba bun ki nongthep vote Bru ki la duh noh ia ki voter identity card jong ka Mizoram ha kaba kim shym la kynmaw shuh ruh ba ki dei na kino ki constituency.
Na ka liang ka sorkar pdeng ha ryngkat ka sorkar Mizoram bad Tripura ki la pyrshang haduh kumba khyndai sien ban pynkynriah pat ia ki trai shnong Bru na Tripura hapdeng u snem 2009 bad 2019, hynrei tang khyndiat eh kiba la wanphai sha Mizoram ha kane ka jingpyrshang ka jong ki.
