Guwahati, Lber 28 : Ha kawei ka jingjia kaba sngew myllung, kawei ka khynnah 8 snem rta ka la duh ei la ka jingim hadien ba ka la shah thombor ha uwei u hati khlaw katba ka hymmen kaba dang 10 snem jong ka, ka la ngat ha ka jingmynsaw jur ha kane ka jingjia kaba la jia hapoh Baksa district ka Assam.
Kane ka jingjia ka la jia hapoh ka shnong Deochunga kaba hap hapoh Goreswar police station jong ka Baksa district, kaba hap ruh hapoh ka Bodoland Territorial Region (BTR), ha kane ka step sngi U Blei ba la lah katba kitei ki arngu shipara ki dang ioh thiah lyngngai hala iing.
Katkum ki khubor la ong ba une u hati khlaw u la pynjulor ia ka iing phlang ka jong ki ha katei ka jingthombor.Ia kane ka khynnah kaba la khlad noh hashen la tip kyrteng kum ka Birgwsri Daimary.
“Kane ka jingjia ka la jia ha ka por 5:15 mynstep katba kitei ki shipara lem bad ki dkhot ka longiing jong ki, ki dang don hapdeng ka jingioh thiah lyngngai.Kine ki hati la ong ba ki la wan na ki jaka khlaw sorkar na ka bynta ban wad bam,” ong u heh ka tnat forest.
Na ka liang ki heh ka tnat forest ki la ong ba napdeng ki sawngut ki dkhot ka longiing ki kmie ki kpa jong kitei ki arngut ruh ki la lait thaw da ka said, katba ia ka hymmen jong katei ka lanot la pynkit noh shapoh Gauhati Medical College and Hospital (GMCH), ha kaba na ka liang ki doktor ki la ong ba ka la don na ka jingma watla kadon hapdeng ka jingmynsaw kaba khamjur.
Ka jingiatyngkhuh hapdeng ki briew bad ki hati ka la nang jur hapoh Assam ha kaba haduh kumba 900 ngut ki briew ki la shah pyniap na ki jingshah thombor ha ki hati ha kine ki 10 snem kiba la leit hapoh ka jylla.
