Imphal, Lber 28: Ka sorkar Manipur ka la pynbna ia ka jingiarap pisa kaba T.5 lak sha kiba haiing hasem jong u khynnah klas 12 uba shah siatiap ha ki runar ki bym lah ban ithuh.
Ia kane ka rai la shim hadien ka jingialang hapdeng u Myntri Rangbah(CM) Biren Singh bad ki dkhot jong ka Joint Action Committee (JAC) ia kaba la thaw ha kaba iadei bad katei ka jingjia shah pyniap.
Ha ka Facebook post, u Biren Singh u la thoh “ka sorkar jylla kan ai ia ka jingiarap pisa kaba T.5lak bad kan pynlong ruh ia ka jingtohkit halor katei ka jingjia shah pyniap jong utei u samla.Na ka liang ka sorkar kan bishar bniah ruh ha kaba iadei bad ka jingai kam sha kiba haiing hasem jong utei u lanot.”
Utei u lanot 17 snem rta u dei uba la tip kyrteng kum u Seigunlal Misao u ba la shah siat iap hajan ka iingsah jong u ha ka shnong Motbung kaba hap haoh Kangpokpi district ha kane ka sngi Saitjain ba la lah ha ka por kumba 8:30 mynmiet.
Lah ban kdew ba ka JAC ka la khot pynlong da ka pakhang lynti ha lynter ka surok National Highway-39 ha ka step sngi U Blei ba la lah kaba la wanrah ka jingthut ha ka leit ka wan jong ki kali kumba katto katne kynta, hynrei hadien ka jingpynthikna na ka sorkar la weng noh ia kane ka pakhang surok.
