Shillong, Nailur 29 : Ka Kynhun khang bam doh masi bala ialam da u Jagadguru Shankaracharya Swami Avimukteshwaranand Saraswati, kala byrngem ban mudui sha Iingkashari Supreme Court pyrshah ia ka Airport Authority of India (AAI) namar ka jingkyntait ban ai jingbit ba kin mih na Agartala ban wan sha Shillong Airport ha ka sngi Saitjain.
Kane kala wan jia hadien ka jingkyrpad jong ka Sorkar ia ka AAI ba kan kyntait ai jingbit ia ka liengsuin ba kyrpang jong kane ka kynhun, ba kan wan hiar ha Shillong Airport namar ka jinglah ban pynmih ia ka jingkulmar bad huri hura kaba jur ha Meghalaya.
U Nongaiktien ka kynhun, u Raja Saksham Singh Yogi ula ong “Ngin leit phai biang sha Guwahati (na Agartala) hynrei ngin sa iaid da ka lynti jong ka ain pyrshah ia ka Airport Authority of India. Shen ngin sa iakren bad ki nongiasaid ain jong ngi ba kin mudui da ka mukotduma pyrshah ia ki nongpyniaid ka Shillong bad ka Agartala Airport”.
“Ngin leit phai biang sha Guwahati bad ngim kwah ban pynmih ia kano kano ka huri hura lane ban pynthut ia ka shongsuk shongshngain. Hynrei ngin sa mudui noh shen da ka mukotduma ha Iingkashari Supreme Court” ula bynrap.
View this post on Instagram
