Shillong, Nohprah 12 : Ka Khun Hynniewtrep National Awakening Movement (KHNAM) kala byrngem ban shim da ka lynti jong ka Ain lada ka Sorkar Jylla ka dang pynslem ban pynkiew ia ka minimum wage (bainong sngi ba rit eh) sha ka dor ka ba iahap bad ka rukom im ba mynta, kum ka jingbud ia ka jingthmu jong ka Minimum Wages Act, 1948.
“Lada ka dang pynslem, ngin hap ban shim ia ka lynti jong ka ain namar ka Sorkar Jylla kala pynkhein ia ka kyndon 3(b) jong ka Minimum Wages Act, 1948 da ka jingbym lah ban pynkiew ia ka bainong sngi wat hadien 5 snem” ong u Working President ka KHNAM Bah Thomas Passah hadien ba aiti ia ka shithi sha ka Tnad Labour ha ka sngi Balang.
Ula ong ba ka jingpynkiew ia ka bainong ka dei kaba la leh khatduh ha u snem 2018, kaba la iaid palat ia ka 5 snem kat kum bala pruid dak ha ka Act ban pynkiew ia ka bainong ia ki nongbylla kiba dei ki unskilled, semi-skilled, skilled bad highly-skilled.
“Kumta, kane ka long kaba beain bad ngi la kyrpad ia ka tnad Labour ba kan khmih ia kane ka kam….bad pynthikna ba ka jingpynkiew ia ka bainong ka dei ban long kat kum ka jinglong ka iew ka hat bad ka rukom im” ong u Bah Passah haba bynrap “Ka Tnad Labour kala pyntip sha ngi ba kila pyndep ia ka homework bad kila dep aiti ia ka jingtyrwa sha ka Tnad Finance bad kane ka kam ka dang sahkut bad ka Sorkar Jylla”.
“Namar kata, ngi kyntu ia ka Sorkar Jylla ba kane ka dei ka bynta kaba kongsan bha namar ka ktah ia kiba bun ki longiing hapoh ka Jylla. Nga tharai ba ka kham kongsan ban ia ki tamasa ruh. Kumta ngi kyntu ia ka Sorkar ba kan khmihnoh mar mar ia kane ka kam” ula bynrap.
Ha kajuh ka por, ka KHNAM kala kynnoh ba ka Labour Rureau ka khlem lah satia ban pynlong ia ka jingwad bniah kaba thikna halor ka jingkiew dor ki mar ki mata ha Jylla hashuwa ban ai jingmut ha kaban pynkiew ia ka Variable Dearness Allowance (VDA) kumba la kren da ka Act 1948.
