Shillong, Nailur 11 : Ka Nongkseh SSCC kala pyni ba haduh katno ka lah ban pynjem khnap ia kiwei ki kynhun da ka jingjop ba haduh 7-1 kol pyrshah ia ka MLP FC ha ka jingiakhun Shillong Premier League 2026 hynne ka sngi Thohdieng ha madan SSA, Polo.
Hadien ka jinghap ban mad ia ki soh ba kthang na ki jingiakhun ba la dep, ka kynhun ialehkai ka Nongkseh SSCC ka la khieh khlieh biang sa shisien bad pynliem kput ia ka MLP FT.
Ban shu bynrap hangne, ka Nongkseh SSCC ka donkam bha ia ka jingjop ban buh ialade hapdeng ka thong jong ka jingiakhun bad ban iaknieh ban rah ia ka nam kum ka lahduh.
Ka Nongkseh kala pyni ia ka jingtbit ialehkai ki rang bad u nam tam ha kane ka jingiakhun u dei u kapten Hardy Cliff Nongbri uba la ioh ban thep haduh 4 tylli ki kol (6 min, 12min, 55min bad 87min).
Katba ia ki kol kiba sah la ioh ban thep da u Kitboklang Pale (42min), Shano Tariang (61 min) bad u Aenam Graffenberg Jyrwa (65 min).
Katba ia ka shi kol ban lait brut ka MLP FT la thep ia ka da u Bisharlang Kharumnuid (78 min).
Da kane ka resol, ka Nongskeh SSCC ba kan kiew yndon kham shalor jong ka miej iakhein point, hadien ba ka la ioh ba kan khur 7 point bad ka goal difference kaba long +5 bad don ha ka kyrdan kaba saw, katba ka Nangkiew Irat (-1) kan iai neh ha ka kyrdan kaba san katba ka MLP FT (-5) da kane ka nam rem ba mynta ka sngi ka hiar pat sha ka kyrdan ba 6.
Lashai ka sngi ka jingiakhun jong kane ka lympung kan long hapdeng ka Shillong Lajong FC pyrshah ia ka Sawmer SC, kaban long ha ka por 3:00 baje nohphai sngi.
