Byrngem ka JNC ban tur sha Secretariat namar ka EIA beain ka Shree Cement | Aipor haduh 15 tarik Jymmang

Shillong, Jymmang 8: Ka Jaintia National Council (JNC) ha ka sngi Thohdieng, kala byrngem ban leit tur sha Meghalaya Secretariat lada ka sorkar jylla ka kam shimkhi hapoh ka 15 tarik u Jymmang, halor ka jingpyrshah ia ka Environmental Impact Assessment (EIA) beain kaba la aiti da ka Shree Cement.

Ha ka kyrwoh, ka JNC kala pynpaw ia ka jingsngewkhia bad ia ka jingbym hun halor ka jingsngap jar jong ka sorkar, hadien ba ka Council kala aiti ia ka jingpyrshah da ka jingthoh ha ka 30 tarik u Iaiong 2026, sha ka Meghalaya State Pollution Control Board, SEIAA Meghalaya bad ka MoEF&CC Regional Office ha Shillong.

Ka JNC kala ong, ba ka kaiphod jongka EIA halor ka jingtyrwa ia ka projek ha East Jaintia Hills “kam iahap bad ka jylla Meghalaya” bad ka pynpaw ba kila don 3 tylli ki jingpynkhein bad la kubur bad pynmih da kiba aiti ia ka kaiphod jongka EIA”.

Ka mat kaba nyngkong, ka JNC kadei halor u pud u sam. “Ha ka sla 1 jongka Draft EIA Report hi, ki consultant kila thoh ha ka ktien phareng kaba suk bha, “Ka aplikeshon na ka bynta katei ka jingthmu ia ka projek kadei kaba la pdiang ha ka jingialang kaba la long ha Gujarat SEAC, da kaba pynshong nongrim ia ki jingai bad jingpyni ia ki kot ki sla halor ka jingthmu ia katei ka projek ha ka SEAC Gujarat & SEIAA kala ai ia ka ToR ban khmih bniah da ka EIA” la pynpaw ha ka kyrwoh.

“Kane ka projek ha East Jaintia Hills, Meghalaya. Ka JNC kala buh jingkylli, ryngkat bad ki rekod ki paitbah. Kumno ka SEIAA Meghalaya kala pdiang bad pyniaid shakhmat ia ki kot EIA ia kaba la phah sha ki bor synshar ha Gujarat? Naduh mynno ba ka Sorkar Meghalaya kala pynlong ia ka Public Hearing na ka bynta jong ka jylla Gujarat?” la ong ka Council. “Kane kam dei ka jingkynnoh, kadei kaba la pynmih ha ki kot ki sla kiba la aiti sha ki bor kiba dei khmih ki jong ngi”.

Ka jingpyrshah ka baar, kadei halor ka jingsngewkhia halor ka “Seismic Classification”. Ka JNC kala ong ba ka EIA kala pyntip ba katei ka projek ka hap hapoh jong ka Seismic Zone VI da kaba pyndonkam ia ka Indian Standard.

“Ka Bureau of Indian Standards kala weng ia katei ka kyrdan mardor lyngba ka jingpynmih ia ka jingpynbna paitbah kaba la pynmih ha ka Gazette of India ha ka 3 tarik u Lber 2026.”

“Ka Seismic Zone VI kam shim la don shuh ha ka ain jong ka ri India ha katei ka tarik. Ka Shree Cement kala phah ia katei ka EIA ha ka 7 tarik u Iaiong 2026 — kata 35 sngi hadien ba kala dep ban weng noh” la pynpaw ha ka kyrwoh.

“Kumno ka Kompani kan lah ban pynlong ia ka Public Hearing haba ka Disaster Management Plan kaba iada ia ki jingim, ka khyndew jong ki paitbah jong ngi kadei kaba la thoh ha ka ain jong ka Sorkar India hi, kadei kaba la dep ban pynduh noh ?”

Kaba lai, ka JNC kala ong, ba ka Jaintia Hills Autonomous District Council kam shim la shah kynthuplang.

“Ka Jaintia Hills Autonomous District Council kadei ka bor synshar kaba khmih ia ka khyndew ka shyiap bad ia ki jingdon jingem ha ka District hapoh jong ka Sixth Schedule ka riti synshar ka ri India. Ka kyrteng ka jongka kam shim la mih, ym shim la iasyllok, ne ai ia ka jingmynjur, ym ha ka jingbhah lang ia ka khajna, ha kano kano ka bynta jong katei ka EIA,” la pynpaw ka JNC.

La pynpaw ba ha ka “Buffer Zone jong klatei ka par ka long 98.79% ka jingdon ki paid riewlum kiba shong basah, ia kaba ka EIA kala pynthikna”.

Ka JNC kala kylli kumno ka JHADC kala shu sngap jar? Kaba mut kumno kane ka jingsngap jar jong ka JHADC ha kaba iadei bad ka hok ka riti synshar jong man la ki longiing riewlum ha ka Elaka Nongkhlieh?

Ka JNC kala pynpaw ba dei ban leh lang noh kumjuh, kumba ka sorkar jylla dang shen kala shim ia ka rai ban pyllait noh ia ka dewlynnong Lumpongdeng na ka jingtyrwa ban tei ia ka Taj Resort Project ha Umiam Lake hadien ba kala mih ka jingpyrshah.

“Ka Sorkar Meghalaya namar ka jingpyrshah ki paitbah, dang shen kala pynduh noh ia ka projek ha Dewlynnong Lumpongdeng na ka jingthmu ban tei ia ka Taj Resort ha Pung Umiam hadien ba kala mih ka jingiakhih kaba la pynlong da kiba bun balang bad ki dkhot jong ka imlang sahlang” kala ong.

“Ka JNC ka kylli ia kane ka juh ka sorkar hi. Ki paitbah ka Nongkhlieh Elaka, East Jaintia Hills hato ki long kiba duna ban ioh ia kajuh ka burom? Balei phim leh lang kumjuh ia kane ruh?”

“Lada ka sorkar ka lah ban pynduh noh ia ka bynta jong ka Taj Resort Project namar ba kiba bun balang kila pynpaw ia ka jingsngewkhia, kumta ka sorkar kadei ban leh lang kumjuh ha kaba iadei bad ka Mining Project ha kaba ka EIA kadei kaba la phah sha ki bor khmih ka jylla Gujarat, kaba shong eh ha kaba iadei bad ki ain jong ka jingshngain bad kyntait ruh ia ka bor synshar tynrai jong ka district” la ong ka Council.

Ka JNC kala kynnoh ba ka jingrung ka Shree Cement kala pyndkoh ia ka imlang sahlang.

“Ki nongrep kiba la ieng ban iada ia la ki jaka, kim shim la ioh ia kano kano ka jingpynsngew na ka sorkar” kala ong.

Kala pynpaw ba ha u Nohprah 2025, ka Public Hearing jong ka Shree Cement Plant ha Daistong, kala kam ba, “Ki nongshong shnong trai kila shah khanglad ban ioh rung sha katei ka jaka ba pynlong ia ka jingialang, la khanglad ia ki da ki riewshimet kiba ieng na ka bynta ka jingmyntoi jong ka kompani, da kaba pyndonkam da ki runar bad riewsniew”.

“Ngi lah iohi ba kane ka kompani kala trei ha kata ka rukom ban pynphiah ia ka jaidbynriew, da kaba leit sha ki nongialam shnong, ban ialam bakla ia ki bor shnong bad pyrshang ban khanglad ia ki kam jong ki kynhun sengbhalang ha ka thain kaba ki thmu ban treikam. Kane kam dei ka kam pynroi, kane kadei ka jingwan rungtuh” la pynpaw ha ka kyrwoh.

Ka JNC kala iengskhem ha ka jingkular kaba la khlei ha ka jingkynmaw burom ia ka sngi ïap u Kiang Nangbah ha ka 30 tarik u Nohprah 2025, “ban ieng tylli na ka bynta ki paid Jaintia”.

“Ka JNC kala phah ia ka jingthoh bad ka jingmaham kaba khatduh sha ka Sorkar: Lada ym ai ia kano kano ka jingpyntip lyngba ka jingthoh hapoh ka 15 tarik u Jymmang 2026, ka JNC Central Executive Committee kan pynjur ia ka jingiakhih beit beit sha Meghalaya Secretariat, Shillong, ha ki sngi ban wan, da ka sur kaba pura bad ka jingiashimbynta jong ki paitbah na East Jaintia” la ong ha ka kyrwoh.

“Ngi ngim dei ka kynhun kaba shu kut ha kaban phah ia ki shithi, ngi dei ka sur jong ki paitbah kaba ka jaka, um, ka khlaw, ki hok ka riti synshar ki don hapdeng ka jingma. Ia ka Public Hearing yn pynlong ha ka 22 tarik u Jymmang 2026, to ngin ia peit ka sorkar kan leh kumno?”

U President ka JNC u Sambormi Lyngdoh ula ong, “Ngi ngim shim la thoh tang ban shu dep rukom. Ngi thoh ryngkat ka jingdon ia ki sabut. Bad kine ki jingshisha ki dawa ia ka jubab”.

Ula bynrap “Ngin ym shong kli kti katba ki kompani kiba nabar kin knieh ia ka hok bad ia ki jaka jong ngi. La seng ia ka JNC ban long ka sur jong ki paitbah bad da kumta hi kan iaid bad long”.