Shillong, Rymphang 01: U Lamphang ka Iingdorbar Thaw Ain Thomas A Sangma ula pynpaw ia ka jingbynniaw halor ka jingiaid suki ka jingpyntrei ia ka Iingdorbar Thaw Ain ba thymmai ka Jylla ha Mawdiangdiang.
Hynrei u Lamphang ula pynpaw pat ia ka jingkyrmen ba kane ka Iingdorbar Thaw Ain ka dei ban dep hapoh ka por bala buh kata ha u Nailar 2024.
U Thomas ula pyntip ba ula hiar jurip ia kane ka jingtei hynne ka sngi Palei bad um sngewtynnad satia ia ka jingiaid jong ka kam.
“Nga la bthah ba kin pynsted wut wut ia ka kam. Ka jingiakren kala mih halor ka jingslem ban poi ki mar kaba lam sha ka jingslem ka kam. Naba ka main hall bad central hall kan don ia u dome uba la shna da ki pre-fabricated steel, kumba 50% na ki tiar kila dep wan poi” ula ong.
U Thomas u pyntip b aka kam kala jan dep artad hynrei ka dei tang ka Central Hall kaba dang sah.
“La kular ia nga ban ka jingtei ia ka Central hall kan dep noh hapoh u bnai Lber. Nga la shimkhia bha ia ka kam, kumta nga la lei ban jurip man la por sha kane ka jaka ban pynthikna ba ka kam kan ym shimpor” ong u Lamphang.
