Shillong, Nailur 02 : Ki samla ka Jylla Meghalaya kim dei satia ban shah ïalam bakla ba tang namar ba kim ioh kam sorkar kin poi noh ha ka kutlad bad shim ia ka rai ban leit pyniasoh sha kino kino ki kynhun da kaba ai daw pat ba ki ieit Jaidbynriew, ong u Bah Prestone Tynsong Symbud Myntri Rangbah ka Jylla.
U Bah Prestone ula kren ia kane ha ka jingialang sam khun sniang sha ki 500 tylli ki Longiing jong ka Mawryngkneng Constituency kum shibynta jong ka Rural Backyard Piggery Mission, kaba long myn ha ka sngi Palei ha Tynring.
“Ki don bun bha ki samla kiba la pass Master Degree kiba wan wad kam da kaba ong ba kim iohkam sorkar. Nga la ju ong ia ki balei kwah tang ka kam sorkar haba hangne ha jylla don bun bha ka kam ban trei,” ong u Bah Tynsong.
Katkum ka jingiathuh jong u, haduh mynta ka jylla ka hap shaniah ha ki nongbylla kiba wan na shabar jylla ban tei Ïing ne shna surok bad ia kiwei kiwei ki projek jong ka sorkar bad wat jong ki bym dei jong ka sorkar ruh.
“Haduh mynta ki nongbylla shna surok ne nongbylla shna Ïing ka bym duna ia ka 65000 ngut la hap ban shaniah beit ia kiba wan na shabar jylla,” u la ong shuh shuh.
Haba batai bniah halor katei ka phang u Bah Prestone u ong ruh mynta bun ki samla na ka jylla ki salia ban trei ia ki kam kiba don ha ka jylla ne ban mih shakhmat ban trei kam la jong hynrei bun ki kwah ban trei tang ka kam sorkar. Hynrei u ong pat ba lada ki wanrah ia ki nongbylla na shabar bun kiba kynthoh da kumne kumtai.
“Watla kiba bun kim kwah ia ngi ban wanrah briew na shabar hynrei ngim lah ban leh eiei namar ki briew lajong kim don bad kim lah bad kumta baroh ki projek kin sa sahkut lut” u la ong.
U la ai nuksa ruh ba ha u snem 2020 haduh 2021 bun ki projek ki sahkut lut namar bym ioh wan ki nongbylla na shabar hadien ba ki nongtrei bar jylla ki la phet lut na ka jingwan syllad ka khlam COVID.
“Da wad nongtrei lajong ruh ym ioh bad lada ioh ruh ka dor bylla ka long mar shiteng na kaba pan kiba nabar. Kumta ki kmie ki kpa ki la dei ban kyndit bynriew ba lada ki khun ki ieit shisha ia ka Jaidbynriew kim dei satia da kaba shoh ia ki briew kiba nabar kiba wan bylla sha kane ka jylla hynrei ban pyndonkam da ka jabieng bad ka jingtrei shitom.”
Ha kane ka jingialang u Bah Prestone u la kyntu ruh ia kiba ïoh ia kitei ki khun sniang ba ai ei ka sorkar ba kin shimkhia bad pyndonkam hok khnang ba ka jylla kan ym donkam ban shaniah na shabar lane ban theh ei ka bai thied sniang bam doh kaba da ki klur klur tyngka ha ka shisnem shabar jong ka jylla .
U ong ruh ba lada ki nongshong shnong ki trei shitom bad minot thop tang ha ka kam lajong kata ka rep ka riang bad ka ri jingri ryngkat ka jingkyrshan ka sorkar kin kiew stet ha ka kamai kajih nangne shakhmat.
