Nongstoin, Nailur 10: Ka Shnong Langshongthiang kaba don ha ka tnain Jaiaw Shallang, West Khasi Hills kila pynpaw ia ka jingbynniaw kaba jur halor ka jingbym lah jong ka Sorkar ban tei ia ka Sub Centre hapoh ka Shnong mynta la palat 10 snem naduh ba ka Shnong kala pynioh ia ka jaka.
Kane ka jaka kaba heh haduh 3 akar eiei, ka dei kaba la ai sngewbha da ka kur Mawsor ha ryngkat ka jingia sngewthuh jingmut lang bad ka Shnong Langshongthiang.
Ka jingai sngewbha ia ka jaka ka long namar ka jingkwah palat ia kane ka jaka sumar ka ban ai ka jingshakri ia ki nongshongshnong ha ka pang ka shitom nalor ki shnong kiba marjan, kiba don kumba 5 ne 6 tylli eiei.
Ka Tnad ka Koit ka Khiah haduh mynta kam pat pyni dak eiei ruh em ban sdang pyntrei ia kane ka sub centre bad ia ka jaka ruh la shu ieh shrap mynta la 10 snem tam.
U bah Daliwell Mawsor uwei na ki samla rangbah jong katei ka shnong, u la ïathuh ba katei ka shnong ka la don kumba 160 ei ei ki tnum iing, ki hap ban leit shaduh ka shnong Umdang ha ka jingjngai kaba kumba 10 km ei ei ban leit shim dawai haba ki pang ki shitom.
“Ka long kaba shem shitom shibun khamtam ïa ki longkmie kiba armet bad kiba dang ïoh khunlung ba kin leit ban phah ai injek, khamtam eh ïa u duk u suk, u kup shilliang sem shilliang u bym don kali lajong” ong une u Rangbah.
“Kum u Kur Mawsor, nga kyntu ia ka Sorkar Jylla bad ia u MLA ban shimkhia lang ha kaban pynurlong ia kane ka jingkwah u paidbah” ula ong.
