Guwahati, Naiwieng 23 :Khyndiat sngi hadien ka jingshah siat iap jong uwei u briew ha ka por mynsngi mynshai ha ki bynta jong ka sorbah Panjabari, na ka liang ka Seng Congress ha Assam kala kam ba ka nongbah Guwahati mynta kam don shuh ha ki kti jong ki pulit ka Assam hynrei ia kane ka sorbah la pyniaid da ki nongtuh nong lute.
Da kaba kynthoh tyngeh ia ka sorkar Assam ba la lamkhmat da u Myntri Rangbah (CM) Himanta Biswa Sarma, u president ka Assam Pradesh Congress Committee Committee (APCC) u Bhupen Borah ula ong; “Kiba bun tylli kiba kum kine ki jingjia kila jia manla ka sngi ha ki bynta bapher bapher ka jylla bad ki briew kim don shuh hapdeng ka jingshngain ha kane ka jingsynshar jong u Sarma bad ka BJP.”
Lah ban kdew ba ha ka 21 tarik mynta u bnai uwei u manager jong ka Purabi Dairy ula shah siat iap najan bha ha ka por dang step, katba kawei pat ka longkmie kala shah lute ia ki jingdeng ksiar nalor ka pisa dang ha kine ki khyndiat sngi ba la dep.
Nalor kata ha ka jingthoh ba la pyllait utei u nongialam ka APCC ula ong ba u CM ka Assam ula bunkam ha kaba leit aijingkren bad iehnoh ia ka nongbah Guwahati ha ki kti jong ki nongtuh bad ki nong lute.
“Ka jinglong jingman kala nang hiar arsut.Katba ka sorkar kala im hapdeng ka spah ka phew hynrei kala buh pat ia ki paidbah hapdeng ka jingbym shngain bad kala shu kylla long ka nong peitkai ia kine ki jinglong jingman,” ong shuh shuh ka jingthoh.
Shuh shuh ka Congress ha Assam kala kam ruh ba u CM Himanta Biswa Sarma ula shang kylleng da ki helicopter ha ryngkat ki bor pahara, kata ha ka thup ‘Z category security’ bad shim ram da ki klur tyngka na ka bynta ban im pahuh pahai, hynrei kane ka sorkar BJP ba mynta kam khuslai ha kaba iadei bad ki kam shong shngain bad ia ki jingdon jingem jong ki riew paidbah.
Kumjuh u Borah ula kynthoh tyngeh ruh ia ka tnat kam pohiing ia kaba la lamkhmat da u CM, kumjuh ia ki heh pulit halor ka jingpulom ka jong ki, kata da kaba ong ba kam dei ka rukom ia ka party synshar ba kan phai lyndet ia ki paidbah.
Shuh shuh u Bhupen Borah ula daa ruh na ki heh pulit bad na u myntri kam pohiing ba ki dei ban kem mardor ia ki briew kiba donkti ha kaba iadei bad kiba kum kitei ki jingjia bad ban pynthikna ha kaba iadei bad ki kam shong shngain jong ki paidbah.
