Shillong, Rymphang 29: Ka Meghalaya State Commission for Protection of Child Rights (SCPCR) kala pyntip ba ka East Khasi Hills District ka dei ka district kaba don bun eh ki case POCSO ne ki kam lehbeijot ia ki Khynnah kynthei bad ka South Garo Hills ka dei kaba duna tam napdeng ki 12 tylli ki District ka Jylla.
Kane ka long kat kum ka preliminary report jong ka SCPCR kaba pyntip ba naduh ba sdang pyntreikam ia ka Protection of Children from Sexual Offences (POSCO) Act 2012, kila don haduh 2566 tylli ki case ha kaba 1984 tylli ki dei kiba dang don hapdeng ka jingbishar jong ki Iingkashari bapher bapher jong ki District ka Jylla.
Ka SCPCR ka pyntip ba ka case ba nyngkong eh bala register hapoh ka POCSO Act ka dei ha ka 4 tarik Jylliew, 2013 hapoh ka Iingkashari POCSO ka East Khasi Hills District.
Ka kaiphod ka iathuh ba haduh mynta, ka jingpyndep ban bishar (dispose) ia ki case POCSO ha Jylla Meghalaya ka long tang 22.68 %.
Ka kaiphid ka pynpaw ruh ba ki case POCSO ne jingthombor ia ka longryngieng ki Khynnah, ka jubor bha ha ka por ba lynshop ka khlam Covid-19 (2020-2021). Ha kine ki snem ba don ka khlam, ka jingdon ki case POCSO kala kot 365 ha u snem 2020 bad 378 ha u snem 2021.
Haba phai sha ki District, ka case POCSO kaba bun duh tam bala register ha ki Iingkashari POCSO ka dei ha East Khasi Hills, kaba la kot haduh 709 tylli ki case, kaba long haduh 28% na ka jingdon ki case POSCO hapoh ka Jylla.
Ka South Garo Hills ka dei kaba duna tam ki case POCSO da 64 tylli ki case kaba long tang 2%.
Haba phai pat sha ka jingrai pynrem ia ki nongleh bymman, lah ban kdew hangne ba ka Ri-Bhoi District kala wan hakhlieh duh ha ka jingdon ki riew bymman ba shah rai pynrem, kaba kot haduh 50 tylli ki case bad la bud da ka West Khasi Hills kaba kot 31 tylli ki case bad ka East Khasi Hills kaba kot 30 tylli ki case.
Ka South Garo Hills bad ka South West Garo haduh mynta ym pat don satia ki riew bymman kiba la shah rai pynrem bad kane lehse ka lah ban dei namar ka jingbym don ki Special Public Prosecutor (SPP) ban bishar ia ki case bad dei namar kata ba baroh ki case POCSO kila sahkut lut ha ka Iingkashari jong kine ki District.
Ka South West Garo Hills district kala don ia ka Iingkashari POCSO naduh u snem 2017 hynrei watla katta ym pat don satia kawei ruh ka case ban rai pynrem.
Ka SCPCR hyne ka sngi Palei, kala pyllait paidbah ruh ia ka kot POCSO Act, 2012 kaba la pynkylla sha ka ktien Khasi khnang ba yn lah ban sngewthuh bha shaphang ka ain da ki paidbah. Ka Commission ka don jingthmu ruh ban pynkylla ia kane ka ain sha ka ktien Garo.
 kala pyntip ba ka East Khasi Hills District ka dei ka district kaba don bun eh ki case POCSO ne ki kam lehbeijot ia ki Khynnah kynthei bad ka South Garo Hills ka dei kaba duna tam napdeng ki 12 tylli ki District ka Jylla.){kind=link}