Shillong, Nailur 10 : Ka United Democratic Party (UDP) kala buh ia ka thong ban khur ia ka jingjop ba palat 30 seat ha ka elekshon MLA-2023 ban long ha Jylla.
Haba kren ha ka jingialang plie ia ka Ophis jong ka Party kum shibynta jong ka jingrakhe ia ka Foundation Day ba 25 snem, u President ka UDP Bah Metbah Lyngdoh ula ong ba ka sur jong ki paidbah ka ong ba tang ka UDP kaba dang dei ka jingkyrmen hapoh ka Jylla.
“Lashem snem, kan long 25 snem hadien ba ka party kala jop 20 seat ha u snem 1998. Nga sngew ba ka party ka dei ban jop palat ia ka 30 seat ha u snem 2023” ong u Bah Metbah, uba bat mynta ia ka shuki Lamphang ka Iingdorbar Thaw Ain ka Jylla.
Kat kum ka jingong jong u, kaei kaba long ba man ha ki shnong ki thaw ka kren shai ba ha kane ka kynti ki paidbah kila iakren ba tang ka UDP kaba dang ai jingkyrmen ia ki ha u snem 2023.
Haba ban jur ia ka jingdonkam ban sngap ia ka sur u paidbah, u Bah Metbah ula ong “Ka shong satang ha ki nongialam jong ka Party kumno ba kin leh halor kane ka jingkhmih lynti bad ban shim ia ka rai da ka jingstad. Namar kata, ngin sa shim lang ia ka rai namar da kaba iatreilang ngin lah ban kynjoh ia ka thong”.
U Bah Metbah u ong ba watla ka UDP kam pat pynbna satia ia ki kyrtong, ki briew na kiba bun ki Constituency kila wan ban pyniasoh sha ka Party, kaba dei ka dak kaba bha na ka bynta ka elekshon ban wan.
Haba pynpaw ba ka Party kala pynlong la bunsien ia ki survey shuwa ka elekshon, u Bah Metbah ula ong “Ngi la sngap ruh ia ki jingai jingmut jong kiba bun ki Nongialam ba kumno kan lam ia ka party sha ka jingjop”.
Hynrei ula maham pat “Ha kane ka jingiaid lynti, ka lah ban pynmong iano iano hynrei sngewbha sngewthuh b aka party ka dei ia baroh ym tang ia ki katto katen ngut”.
U Bah Metbah ula pynkynmaw ruh ba ka lyer jong ka UDP kala nang khlain naduh u snem 2018 hadien ba ka party kala laban jop haduh 3 tylli ki elekshon shiteng samoi kiba long ha Ranikor, Shella bad Mawphlang.
Shuwa kane, u Bah Metbah ula pynkynmaw ba ka UDP ka dei kaba la seng da ka jingthmu ban pyniatylli ia baroh ki seng riewlum hapoh ka Jylla. Kat kum ka jingong jongu, ka jingpyrshang ban wanrah ia ka jingiatylli ka dang iaid haduh mynta mynne.
U Myntri Sorkar Bah Renikton Lyngdoh Tongkhar uba lah ban mih noh na ka HillsState Peoples Democratic Party (HSPDP) ban iakhun ia ka elekshon na ka ticket jong ka UDP na Mawkyrwat, ula iadonlang ha kane ka jingrakhe.
Kiwei pat ki MLA kiba la iadonlang ki kynthup ia u MLA ka Congress ba shah sospon na Nongpoh Bah Mayralborn Syiem, bad u MLA ka AITC na Sutnga-Saipung ma Shitlang Pale. Kine arngut ki lah ban iasoh noh sha ka UDP hashuwa ka elekshon MLA 2023.
