Shillong, Risaw 16 : U Vice President a Ri Jagdeep Dhankhar ha ka sngi Balang, ula buh ia u mawnongrim jong ka Meghalaya Skill and Innovation Hub ha ka jingdonlang u Lat ka Jylla CH Vijayashankar bad u Myntri Rangbah ka Jylla Conrad K Sangma.
Une u Vice President ula pyllait paidbah ruh ia ka CM Business Catalyst : Student B-Plan Challenge bad ka IIM bad don lang ha ka jingiasoi ia ka MoU hapdeng ka UNDP bad ka Sorkar Jylla ban kyntiew ia ka kam sengkam lajong ha Jylla.
Ia ka Meghalaya Skill and Innovation Hub yn trei ha ka jaka kaba heh haduh 6.54 acre ha New Shillong ha ka jingpynlut ba kot T.77.5 klur. Kane ka jingtei kan pynbiang ia ki jingdonkam jong ki samla ban ai jinghikai, jingiatreilang bad ka jingiatreilang ha ki kam ba ki seng.
Haba kren ha ka jingialang, u Vice President ula iaroh ia u Myntri Rangbah ka Jylla Conrad K Sangma namar ka jingwan rah ia ki prokram bapher bapher ki ban iarap ban pynroi ia ka sap jong ki khun samla ka Jylla.
Ula ong ba ka Skill and Innovation Hub kan iaid jngai bha ha kaban kyntiew ia ka kam sengkam lajong hapoh ka Jylla. Ula kyrmen ruh ba kane ka Centre kan pynkhlain ia ka jingpynmih ia ki briew kiba tbit ban trei ban ktah hapoh ka Jylla.
“Ka jingpynroi ia ka sap ki samla ka dei kaba donkam bha ha kane ka por” bynrap u Vice President haba pynpaw ba u Myntri Rangbah Duh ka Ri ula plie ia ka jingkhang jong ki lad ki kabu na ka bynta ki samla lyngba ki prokram bapher bapher ban pynroi ia ki sap bad ban sengkam thymmai (startup).
Ula pyntip ruh ba ka Sorkar Pdeng kala mang haduh T.60 hajar klur ban pynroi ia ka sap jong ki 5 lak ngut ki samla ha kine ki 5 snem ban wan hapoh ka Ri.
U Lat ka Jylla ula kren halor ka jingkhlain bad ka jingriewspah jong ka Jylla ha ka mei mariang ka ban plie ia ki lad ki lynti na ka bynta ki samla ka Jylla.
U Myntri Rangbah ka Jylla ula ong ba ki samla ka Jylla ki dei ka bor jong ka Jylla. Ula ong ba ka Sorkar Jylla kala kyrshan borbah ia ka sengkam sengjam bad khnang ban pyndap pynbiang ia ka jingduna ki nongtrei, ka Sorkar kala wanrah ia ka Skill and Innovation Hub.
“Haduh 85% na ki nongshongshnong ki dei kiba hapoh ka 45 snem. KI samla ki dei ka bor ba khlain duh bad ka nongkynti bad ngi la wanrah ia ki prokram ka ban lah pyndonkam ia ka bor ong ki samla jong ngi” ong u Myntri Rangbah.
Haba kren halor ka jingkyntiew ia ka sengkam sengjam ha ki jaka nongkyndong, u Myntri Rangbah ula pyntip ba ka Sorkar kala pynlong ia kiba bun ki jingiakop business plan bad ban kyrshan ia ki nongsengkam lajong.
“Ngi la ai ka jingkyrshan bad iasnohkti lang bad ki nongsengkam jong ngi lyngba ki prokram kum ka CM Elevate bad ki subsidy bapher bapher” ula bynrap.
