Shillong, Nailur 28 : Ki paid Karbi kila buh kyndon ia ki paid Khasi-Pnar ka shnong Lapangap ba lada ki kwah ban ioh leit ot ia u kba na ki pynthor, ki dei ban jynrat shwa ia baroh ki symbai dieng bala thung ha Loom Moopyrdet bad loom Pdeinphniar.
Kane ka jingbuh kyndon jong ki Karbi kala mih ha ka jingialang hapdeng ki bor District ka West Jaintia Hills bad ka West Karbi Anglong, kaba long hynne ka sngi Palei ban pynkut noh ia ka jingiakhun thma jri kaba la sdang naduh ka sngi nyngkong.
Ia ka bor District ka West Jaintia Hills la ialam da u Deputy Commissioner BS Sohliya bad u Superintendent of Police Bah C Syrti katba ia ka West Karbi Anglong la ialam da ka Deputy Commissioner Krishna Baruah bad u Superintendent of Police U Barua.
Kat kum ka khubor bala ioh lum la iathuh ba ki paid Karbi kila buh ia ka jingdawa ba ki paid Khasi-Pnar ki dei ban jynrat noh ia baroh ki symbai dieng ba ki thung ha Loom Moopyrdet bad Loom Pdeinphniar kaba hap hapoh ka Shnong Lapangap.
Kila pynsngew ruh ba lada ki paid Khasi-Pnar ki kwah ban leit ot ia u kba na ki pynthor ha Lapangap bad Nongjrong, ki dei ban pynurlong shuwa ia ka jingdawa.
Ka khubor ka iathuh ba wat ki Pulit ka Assam kila ai ka jingkular ba ki kloi ban ai pahara ia ki paid Khasi-Pnar ba kin leit ot kba na ki pynthor ha kine ki shnong lada kila pyntreikam ia ka jingdawa jong ki Karbi.
U Waheh Chnong ka Lapangap Bah Deimon Lyngdoh ula pyntip ba un sa lum ia ka jingialang lashai ka sngi ban iathuh ha ki Nongshongshnong halor ka kyndon ba buh da ki Karbi.
Pule lang ia kane: Maham tyngeh u CEM ia u bar Jylla ba shalan khyndew be-ain na Pilangkata sha Assam
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
