Shillong, Nailur 28 : U Myntri ka Ministry of Petroleum and Natural Gas Hardeep Singh Puri ha ka sngi Palei, ula aiti ia ka ‘Green Ribbon Champions award sha ka Sorkar Meghalaya halor ka jingkut jingmut ka ba radbah ban iada ia ka mei mariang.
Ia kane ka khusnam la pdiang da ka Myntri ka Tnad Agriculture and Farmers’ Welfare ka Jylla Kong Ampareen Lyngdoh ha ka 5th Edition jong ka SDG Summit ba long ha New Delhi ha ka 27 bad 28 tarik Nailur.
“Nga sngew burom eh ban iadon bynta ha ka jingialang “Green Ribbon Champion” ha kaba ka Meghalaya kala ioh ia ka jingithuh halor ka jingkut jingmut ban iada ia ka mariang. Nga kwah ban ai ka jingkhublei ia ka Network18 kaba la ai ka jingithuh ia ka jingpyrshang jong ka Jylla jong ngi” ong ka Kong Ampareen haba ai jingkren.
Ka ong b aka rukom long ki jaka ha Meghaya, kaba don 94 % ka khlaw bala long trai da ki Shnong ki thaw, ka kren jam halor ka jingkongsan ia ka jingiashimbynta lem jong ki Shnong ki Thaw ban lah pynkylla biang ia ka jingkylla ka suinbneng,
“U Myntri Rangbah jong ngi uba iohi jngai kum u Nongialam, ula ban jur ia ka jingiadon bynta lang jong ki Shnong ki Thaw ha kaban khmih ia ka spah mariang ba don kyrhai ha Jylla. Ka Meghalaya, ha u 2019, ka dei ka Jylla ba nyngkong eh ban wanrah ia ka Integrated Water Policy, bala pynbud da ka Water Mission, pynshlur ban tyngkai ia ka um bad thaw ia ki lad ki lynti ruh ban kamai jakpoh” kala ong.
“Ki Shnong ki Thaw kila long ki Champion ha ka jingiada ia ki khlaw ha ki catchment area. Ka nuksa ba phalang eh ia kane ka jingkut jingmut kala paw sakhi na ka Mawsynram Declaration, ha kaba 24 tylli ki Shnong na Mawsynram Block kila iatylli ban iada ia ka catchment area kaba kongsan bha” kala bynrap.
Haba ithuh ia ka jingdonkam ban nang sumar ia ki khlaw ki btap, ka Kong Ampareen kala ong “Ngi la sdang ia ka Forest Management Plan (FMP) da 400 tylli ha u 2022 bad sa 500 kiba dang pynkhreh, ki ban ai jingmyntoi bha ia ki briew jong ngi”.
Ka Myntri ka ong ba kumba 80% na ki nongshongshnong ka Jylla ki don ha ki jaka nongkyndong bad 70% ki dei kiba shaniah ha ka rep ka riang. Ka ong ba ka sienjam bala shim da ka Sorkar ban pynshlur ia ka rukom rep ba tang ka sboh khyndew beit (Natural Farming) kala iarap bha ban lah pynmih ia ki marrep kiba tei ia ka met, ban pynduna ia ka jinglut jingsep ha ka rep bad pynduna ruh ia ka jingpynmih carbon.
Kala pyntip ruh ba ha u snem 2022, ka Sorkar Jylla kala pyntreikam ia ka skhim Payment for Ecosystem Scheme (PES) ka ban pynshlur ia ki Shnong ki Thaw ba kin iada ia ki khlaw, kaba long palat 17,00 hectare ha ka phase-I da ka thong ban kynjoh haduh 50,000 hectare ha ki san snem ban wan.
