Phiah la ka jong ia ka mudui ka NE bad ki Ri Thor ka India
Shillong, Lber 19 : Ka Iingkashari Supreme Court, kala buh ban bishar ha ka 9 tarik Iaiong, ia ki mudui ban pynsangeh treikam (stay) ia ka Citizenship (Amendment) Rules 2024, na ka bynta ban pyntreikam ia ka Citizenship (Amendment) Act hapoh ka Ri.
Ka Supreme Court kala bthah ia ka Sorkar Pdeng ba kan ai ia ka jubab ia baroh ki mudui ba kwah pynsangeh ia ka jingtreikam ka CAA Rules hapoh ka lai taiew.
Ia kane la pyntip da u Chairman ka North East Students Organisation (NESO) Bah Samuel B Jyrwa, hadien ba mih na ka Iingkashari Supreme Court, kaba shong bishar ia ka mukotduma hynne ka sngi Ba-ar.
Ka Iingkashari Supreme Court kala shong bishar ia palat 200 tylli ki mudui (petition) ba tynjuh pyrshah ia ka jingpyntreikam ia ka Citizenship (Amendment) Act hapoh ka Ri.
U Bah Samuel ula pyntip ba ka Iingkashari kala phiah ruh la ka jong ban shong bishar ia ki mudui kiba dei jong ka Thain Shatei Lam Mihngi ka Ri India lem bad jong ki Jylla Ri Thor ka India (main land).
Ka Iingkashari kala thung ia u Nongsaid Ain ka NESO u Ankit Yadav kum u Nodal Officer jong ki nongmudui ka thain Shatei Lam Mihngi.
Haba kylli, u pyntip ba bun na ki mudui jong ka Thain Shatei Lam Mihngi ki dei kiba na Assam bad katto katne na Tripura lem bad ka NESO kaba mihkhmat ia baroh ki Jylla jong ka thain.
Halor ka mukotduma pyrshah ia ka Citizenship (Amendment) Act, une u Nongialam ka NESO u pyntip ba ka Sorkar Pdeng kala pan por na ka Iingkashari ba kan ai jubab ia baroh ki mudui kiba don pyrshah ia ka Act.
“Namar ka jingdon bun palat ki mudui, ka Sorkar India kala pan por na ka Iingkashari ba kan ai ia ki jubab” ula ong.
Hynrei u iathuh ba ia ki mudui ban pynsangeh treikam ia ka CAA Rules, ka Iingkashari kala buh ban sa bishar ha ka 9 tarik u Iaiong.
Ha u 2019, ka Parliament kala mynjur ia ka Citizenship Amendment Act, kaba thmu ban ai long nong India ia ki briew ki bym dei ki Muslim, kiba ngat ha ki kam thombor ha Bangladesh, Pakistan bad Afghanistan, kiba la wan poi sha India shuwa ka 31 tarik Nohprah, 2014.
 ia ka Citizenship (Amendment) Rules 2024, na ka bynta ban pyntreikam ia ka Citizenship (Amendment) Act hapoh ka Ri.){kind=link}