Shillong, Lber 19: Ka Khasi Students Union-Tyrsad Circle ha ka sngi Nyngkong, kala leit ban ai jingiarap ia kawei ka skul Lower Primary hapoh ka thain, hadien ka jingshem ia ka jingsohsat ki khynnah skul namar kiba bun ki jingeh.
Ka KSU kala lap ruh ba kane ka skul ka hap ban pynshong klas ha kajuh ka kamra ia ki khynnah kiba shong naduh klas arit haduh klas 5.
Kane ka skul ka dei ka Rangshangkham Lower Primary School kaba don ha ka shnong Rangshangkham, kaba jngai tang 40 Km na Nongbah Shillong bad tang 4 Km na Tyrsad.
Ka KSU kala lap ruh ba ka kamra shet jingbam sngi ia ki Khynnah ha kane ka skul, ka long kaba isangsot bha namar ka jingpei lut ki tnum iing.
Ka Khasi Students Union-Tyrsad Circle haba iohi ia kane, kala leit ban ai jingiarap da ki tin sop iing sha kane ka ingskul ba kan ioh maramot khnang ban bit ban biang ki khynnah.
Ka KSU-Tyrsad Circle hapoh ka jingialam u Organising secretry Postar Rynjah, kala aiti ia ki tin sop iing ha u Head Master ka skul Bah David Khasain ha ka jingiadonlang ki nonghikai.
