Shillong, Nailur 08 : U MLA ba shah sospon ka Liang Pyrshah-Voice of the People Party (VPP) Bah Adelbert Nongrum, ula pynpaw ia ka jingbym sngewtynnad bad buh jingkylli ha Iingdorbar Thaw Ain ba iadei bad ka jingshah sospon ha ka party.
U Bah Adelbert uba mihkhmat ia ka North Shillong Constituency, ula buh jingkylli ba balei u shah kyntait sharud watla u dei u MLA ka VPP.
Une u MLA ula shah sospon ha ka 24 tarik Lber, 2025 halor ka jingkynnoh ba u leh ia ki kam kiba long pyrshah ia ka party.
Ha ka sngi sdang jong ka Dorbar Synrai ka Iingdorbar ha ka sngi Nyngkong, u Bah Adelbert ula pyr shang ban buh jingkylli da kaba ong “Nga lah ban pan jingshai balei ba ma nga kum u MLA ka VPP nga hap ban mad ia kane. Balei ba phi phah shong ia nga sha ka shuki ba hadien duh”.
Haba u Lamphang Thomas A Sangma u kylli ba hapoh ka rule aiu ba u buh ia kane ka jingkylli, u Bah Adelbert ula pynshai ba u khlem buh satia ia ka jingkylli hynrei u pan jingpynshai halor ka jingshah sospon jong u.
Ula iasaid ba ka jingsospon ia u ka dei kaba “long beain” bad ong “ Ki (VPP) kim shym la thoh sha nga kum u MLA ka North Shillong (ha ka shithi sospon) hynrei kila thoh sha nga kum u Adelbert Nongrum, Shillong”.
Halor kane, u Lamphang ula kular ba un sa khmih ia kane ka kam.
“Ia kane ka kam yn sa iakren kham hadien ha ka kamra jong nga” ong u Thomas haba pynpaw ba ka por kam iahap satia ban iakren ia kane ka kam hapoh ka Iingdorbar.
 Bah Adelbert Nongrum, ula pynpaw ia ka jingbym sngewtynnad bad buh jingkylli ha Iingdorbar Thaw Ain ba iadei bad ka jingshah sospon ha ka party.){kind=link}