Shillong, Jymmang 02 : Ka Hynniewtrep Youth Council (HYC) ha ka sngi Palei, kala buh jingkylli ia ka rai jong ka Sorkar Jylla ban pan jingshai haba iadei bad ki 342 tylli ki Longiing ka Them Metor, Them Iew Mawlong na ka Shillong Municipal Board (SMB) kaba ai jubab ia ki jingtip bala pan lyngba ka RTI Act, 2005.
Kat kum kane ka RTI, ka SMB kala pyntip na ki 342 tylli ki Longiing ha Them Metor, tang 194 tylli ki dei ki longiing jong ki briew ba trei ha ki tnad Sorkar katba 148 tylli ki dei kiba shu shong beain.
“Ka jingkren u Symbud Myntri Rangbah ba khmih ia ka Tnad kam Pohiing Bah Prestone Tynsong hynnin ka sngi ba ong b aula phah (ia ka jubab RTI ba ioh da ka HYC) sha ka SMB bad Urban Affairs ban pynthikna biang ka dei kaba kam kai ha kawei ka liang. Kumno un phah ia ka dorkhas jong ngi sha kajuh ka tnad kaba ai jubab ia ka RTI jong ngi. Kumno kan mih ka jingkylla?. Hato kin pynkylla noh ia ki jingkhein? Hato kin pynkylla noh ia ki jingshisha mynta?. Kin sa mad ia ka jingeh kaba khraw. Kumno phi pynlong ia u briew, u bym dei u nongtrei ka SMB-hadien b aula kren ia kane ka ishu-un ong ba mynta ula dei u nongtrei ka SMB, kaba dei ka kam ka bym lah ban long” ong u President ka HYC Roy Kupar Synrem.
“Ngi ieng skhem bad ka jingdawa jong ngi bad ngin sa iapeit ia kaei ka jingpynshai ban sa ai da ka SMB. Hadien kane ngin sa leh ia kaei kaba donkam” ula ong.
Ula ong baka Sorkar kan sa pynlong ia ka jingialang bad ka Harijan Panchayat Committee (HPC) ha ka 7 tarik Jymmang. “Hynrei, ngi ieng skhem ba ngim don ishu bad jingeh lada ka Sorkar ka ai quarter sha ki nongtrei jong ka Sorkar Jylla hynrei kam dei ban ai ia kano kano ka jingmyntoi sha kino kino ki longiing ki bym dei ki shakri ka Sorkar” ula bynrap.
Ka HYC kala dawa ruh ia ka Sorkar ban kyndang beit noh ia ki 148 tylli ki longiing ba shu sah be-ain ha Them Metor, Them Iew Mawlong hadien ka jignshem na ka RTI bala ai jubab da ka SMB.
Halor ka jingpynslem ban pynbeit ia kane ka kam, u President ka HYC ula ong “Ngim pat shym la iohi ia ka Sorkar, kaba don ia ka mon ban shim rai halorkano kano ka kam. Ngi la iohi ia ki Committee kiba mih bad kiba leit hynrei ngim pat iohi ia u soh haduh mynta bad kane ka Sorkar ba mynta ruh kam iapher na ki Sorkar kiba la leit noh hynrei haba ong ia kane, ngi kyrmen pat ba kane ka Sorkar kan shim ia ka rai ba khatduh naba ngi kwah ba kine ki briew kin shah pynkynriah noh na katei ka jaka. Ngim kwah ba kane ka kam kan iai mih biang bad ktah ia ka jingshngain jong ka Jylla baroh kawei”.
Ula byrngem ruh ba ka HYC kan sa leh ia kaei kaba donkam lad aka Sorkar ka dang iai bteng ban pynslem haba iadei bad kane ka kam.
