Shillong, Jymmang 02 : Ka Chief Engineer ka Public Health Engineering (PHE) BM Lyndem ha ka sngi Palei, kala kyntu ia ki paidbah ka Nongbah Shillong ba kin tyngkai bha haba pyndonkam ia ka um namar ka jingnang hiar ka um ba pyllang ha Dam Mawphlang, kaba dei ka tyllong umbam umdih jong ka Nongbah.
Kat kum ka jingong jong ka Chief Engineer, ka jinghiar jong ka um ka dei namar ka jingtyrkhong palat ka suinbneng bad kiwei kiwei ki daw.
Hynrei wat hapdeng kane ka jinghiar, ka um ba don hapoh ka Dam ka dang long ban sam umbam umdih sa kumba 3/4 bnai kat kum kane ka jinglong jingman, kala ong ha ka kyrwoh.
Halor kane ka jinglong jingman, la kyntu ia ki paidbah ba kin pyndonkam tyngkai bha ia ka um kat kaba ki lah.
