Mairang, Nailar 29: U MLA ka Mairang bad Lamphang ka Iingdorbar Thaw Ain ka Jylla bah Metbah Lyngdoh ula kyntu ia ki Nongshongshnong ka Jylla ban bud ia ki dienjat jong u Tirot Sing ban lah pynneh pynsah iala ka jong ka tynrai.
U Lamphang ula kren ia kane ha ka prokram nala tynrai bala pynlong da ka North East Zone Cultural Centre (NEZCC) Dimapur bad ka tnat Arts and Culture ka jylla Meghalaya, hynne ka janmiet ha Nongkhlaw kum shibynta ban leh burom ia u Riewshlur ialeh laitluid ka Ri u Tirot Sing Syiem ha ka jingrakhe ia Ri India ia ka Azadi ka Amrit Mohatsav.
Ha kane ka prokram ïa kaba la pynlong ha Khasi Patriotic Home, Nongkhlaw la iadon ryngkat u Syiem ka Hima Nongkhlaw, u Pa’iem P.M Syiemlieh, u Additional Deputy Commissioner ka Eastern West Khasi Hills District, u Bah A. Nongbri, u Superintendent of Police ka District, u Bah M. B Syiem, I Assistant Director ka Directorate of Arts and Culture, I Kong D. Kharjana, u Syiem Khynnah ka Hima Nongkhlaw, u Bah K. M Syiemlieh, ki dkhot ka kur Syiemlieh, u Sordar ka shnong Nongkhlaw, u Bah Clement Dkhar, ki khynnah skul bad ki paidbah nongshong shnong ka shnong Nongkhlaw.
Ha ka jingkren kum u kongsan, u Lamphang ka Ïing Dorbar Thaw Aiñ ka jylla, u Bah Metbah Lyngdoh u la ong ba ka jingrakhe ïa ka jingkhraw u Tirot Sing Syiem lyngba ka jingrakhe ka Ri India ïa ka Azadi Ka Amrit Mahotsav, ka pynkynmaw ïa ki paidbah nongshong shnong, ïa ka mynsiem ba shlur bad bym aili jong ki riew ïaleh laitluid ka ri.
U la ong ba ka pynïoh ruh ïa ka lad ka kabu na ka bynta ki paidbah nongshong shnong, ban pyrkhat halor u synñiang u bynhei u ba ki lah ban noh, kum shi bynta ban kyntiew ïa ka bha ka miat jong ka imlang sahlang lyngba ki sap ki talen ba u Blei u la ai ha ki.
Ha kane ka sngi, u Bah Metbah u la khot la wer ruh ïa ki paidbah kiba la sakhi lang ïa kane ka prokram, ba kin ring jingmut na ki jinghikai jong ka jinglong jingim u Tirot Sing Syiem, u ba la ïakhun doh ïap pyrshah ïa ki bor ka sorkar phareng, ban pynneh pynsah ïa ka kolshor bad ka snap kyrpang jong ka ri lum Khasi.
La pynphuh pynphieng ïa kane ka prokram da ki jingrwai tynrai, jingshad tynrai bad ruh ka skit halor u Tirot Sing Syiem da ki riew don sap ka Distrik bad kumjuh kiwei de kiba la wan na nongbah Shillong.
Kiwei kiwei kiba la kren ha kane ka prokram ki kynthup ïa u Syiem ka Hima Nongkhlaw, u Pa’iem P.M Syiemlieh bad I Assistant Director ka Directorate of Arts & Culture, I Kong D. Kharjana.
