Shillong, Naitung 21: U Symbud Myntri Rangbah ka Jylla Bah Prestone Tynsong hynne ka sngi palei, ula bthah ia ka Tnad Urban Affairs ba kan kdew ia ar-lai tylli ki jaka ha ka jingtyrwa jaka ban pynkynriah ia ki 342 tylli ki Longiing na Them Metor, Them Iew Mawlong.
Kane kala mih hadien ka jingpyrshah kaba jur naka Dorbar Shnong Mawbah bad u MLA halor ka jingthmu jong ka Sorkar ban ai 3 acrea ka jaka hajan ka RP Chest Hospital ban tei ia ki Iingmala ban pynsah ia ki briew ba shah pynkynriah na Them Metor.
U Bah Prestone uba dei u Chairman ka High Level Committee (HLC) ula ong ba ka jaka hajan ka RP Chest Hospital ka dei kawei na ki jaka bala ithuh ban pynkynriah ia kine ki briew hynrei kam pat don satia kano kano ka jingshim rai.
“Namar kata, ngi la bthah ia ka Tnad Urban ba kan wanrah sha ngi ia ka jingtyrwa ka ban kdew ym tang ia kawei ka jaka hynrei ka ban don ar ne lai tylli ki jaka” ula ong.
U Bah Prestone ula pyntip ba ula iakynduh ia u Rangbah Shnong ka Mawbah bad MLA ka West Shillong Bah Mohendro Rapsang bad kila pynpaw ia ka jingbym sngewtynnad ban pynkynriah ia ki briew na Them Metor sha Mawbah.
“Nga la kyntu ia ki ba kin long kiba iai shah namar ngam pat lah ban ong eiei ia mynta naba ka jingtyrwa kam pat poi satia ha kti jong nga. Nga sngewthuh bad nga burom ia ka jingsngew jong ki bor shnong ka thain bad ngin pyrshang katba lah na ka Sorkar ban pynkmen ia baroh ki liang” ula ong.
Ka Harijan Panchayat Committee dang shen kala pynpaw ia ka jingbym sngewtynnad ia ka rai ban pynkynriah ia ki briew na Them Metor sha Mawbah.
U Nongialam ka HPC u Gurjit Singh ula pynkynmaw b aka 25 tarik Iaiong,ka HPC kala mynjur ban kynriah noh na Them Iew Mawlong halor ka kyndon ba ka Sorkar ka dei ban ai 200 fq meter ka jaka sha kawei pa kawei na ki 342 tylli ki Longiing, kaba hap hapoh ka European Ward nalor ban bei tyngka ruh ia ka jingtei iing.
“Hynrei, ka jaka hajan RP Chest Hospital kam hap satia hapoh ka European Ward. Namar kata, ngin sa iakren bad kat kum ka rai jong ki nongshongshnong ka Them Metor, ngi dawa ban ai jaka beit ha European Ward” ong u Singh.
Haba kylli, u Bah Prestone ula ong “Ka jingkylli halor ka European Ward lane ka jingkylli halor ka Khasi Ward lane ka jingkylli halor ka Meghalaya Ward kam mih satia”.
U ong ba shisien bala dep pynkhreh ia ka blueprint ne ka jingtyrwa, yn sa pynlong noh ia ka jingialang bad ka HPC ban iakren ia ki kam. “Nga thikna ba kan don beit ka lynti ban iapynbeit” ula bynrap.
