Tura, July 7: Ka Sorkar Meghalaya kala shim sa ia kawei ka sienjam ban pynkhlain ia ki jingtei ia ki skul da kaba bthah ia baroh ki Government, SSA Lower Primary bad Upper Primary School ha West Garo Hills ba kin sdang noh mardor ban tei ia ki jaka pynlang ia ka umslap ne Rainwater Harvesting, ki jaka iaid kyrpang na ka bynta kiba don jingduna ha ki dkhot met bad ki jingker ban ioh bat ha ka por ba iaid ba ieng.
Kane ka jingbthah jong ka Office ka District Mission Coordinator, Samagra Shiksha, West Garo Hills, kala mih hadien ka jingioh jingbit ia ki projek hapoh jongka Project Approval Board (PAB) 2026-27.
Ki skul kila ioh ia ka jingbthah ban sdang noh mardor ia ki jingtrei bad ban pynthikna ban pyndep ha u Nailar 2026.
Kane ka sienjam ka thmu ban pynbha ia ki jingtei ha ki skul da kaba pynlong ia ki jaka pule kiba lah ban pyndonkam da kiba don jingduna ha ki dkhot met ha ryngkat bad ka jingkyntiew ia ka jingpynneh pynsah ia ka um.
Kane ka jingai jingmynjur ia ka rainwater harvesting kan kynthup ia ka jingshna ia ki lad ban lum ia ka um kaba tuid hajrong ban poi sha ki pipe um bad nangne sha ka jaka ban pynkhuid bad ban pynlang ia ka um.
Ha kajuh ka por ki lynti iaid bad ki jaka ban bat da ki kti ha ka por ba iaid kin dei kiban tei katkum ka jingbthah ban pynsuk ia ka leit ka wan shapoh skul.
Ka hukum kala bthah ruh ia ki Heads of Schools, Cluster Resource Coordinators (CWC) bad Junior Engineer (JE) ban khmih bniah ia ka jingpyntrei ia ki kam ban don ia ka kyrdan bad ka jingpaka bad ban pynthikna ba dei ban bud ryntih ia ki kyndon jingbthah.
La bthah ruh ia ki skul ba kin aiti man la ka bnai ia ki jingtip bad ki dur ki dar halor ka jingiaid shakhamt jong ki kam ki kam ha ka por ba dang pyntrei bad ba lah dep ruh ban pyntrei ia ki projek.
Hadien ba lah pyndep, ia ki sertiphiket kiba la dep pyntrei, ki kot ki sla kiba iadei bad ka jingpynlut pynsep, ki kot ki sla ha ka jingthied ia ki mar ki mata bad ki jingtip ba pura halor ki Bank Account yn hap ban aiti ban ioh ban pyllait noh ia ka pisa.
U Myntri Rangbah u Conrad K. Sangma ula iai banjur ba ka sorkar ka iengskhem ha ka jingkular ban pynbha ia ki jaka pule. “Ka thong ka jong ngi ka long ban pynthikna ba man la ki khynnah kin pule ha ki skul kiba don ia ki jingtei kiba paka bad ka sawdong sawkun kaba biang ban pule puthi. Ngi lah bei tyngka bha na ka bynta ban iaineh bad ban wanrah jingkylla ia ki skul ha kylleng jong ka Meghalaya” ong u Conrad Sangma.
Ki ophisar kila ong, ba kane ka jingbthah kaba thymmai, kadei shi bynta jong ka jingpyrshang kaba iar jong ka sorkar ban pynbha bad pynbit pynbiang ia ki skul katkum kane ka juk kaba mynta ha kylleng ka jylla Meghalaya da kaba thaw ia ka jinglong jingman kaba shngain, kaban long salonsar ia baroh bad kaban pynneh pynsah ia ka mariang ha ki jaka pule jong ki khynnah.
