Shillong, Nailar 18 : U Myntri ka Koit ka Khiah Bah Wailadmiki Shylla ula ong ba ka Meghalaya kam pat iohi satia ia kano kano ka jingkiew ba idon jingma na ka jingpang dengue, haba bthah ia ka Tnad ka Koit ka Khiah ban peitngor bha ha ki jaka khappud hadien ki khubor na Bangladesh.
“Ngi la bthah ia ki kynhun jong ngi, khamtam kito kiba don ha ki jaka khappud,ba kin peitngor bha” ong u bah Wailad haba iakren bad ki nongthoh khubor ha ka sngi Ba-ar.
“Ia mynta, ngim pat ioh satia kano kano ka khubor ba idon jingma na kitei ki thain” ula ong.
U Myntri u ong ba ki kynhun peitngor kila khmih bniah bha ia ka jinglong jingman bad la bthah ia ki jaka sumar naduh ki Sub-Centre, PHC bad CHC ha Jylla ba kin ai khubor mardor lada ki isuba ia ki nongpang.
