Shillong, Nailar 18: Ka KSU Mawprem Circle bad Upper Shillong Circle ha ka sngi Baar kala ioh bat kumba 10 ngut ki bar jylla ryngkat bad ki Khun ki kti, ki bym don satia ia ki kot ki sla ban pynshisha ba kidei ki nongshong shnong ka ri India.
Kat kum ka kyrwoh, la iathuh ba ki dkhot ka KSU kila kylli bniah ia kine ki briew haba iadei bad ka jaka ba ki wan bad thmu ban leit, hynrei la ong ba kine ki briew kim shim la lah satia ban batai shai.
Kila phah ruh ban pyni ia ki kot ki sla ban pynshisha ba ki dei ki nongshong shnong ka Jylla ne ha India, hynrei kine ki briew kim shim la don satia ia kino kino ki kot ki sla.
Namar kata, ka KSU kala aiti noh ia kine ki briew sha ki pulit jongka Jhalupara Outpost ba kin leh ia kaba donkam bad ban tohkit bniah ia ka jingrung jingmih jong kine ki bar jylla.
