Shillong, Naitung 07: Ka myntri sorkar kaba dei ruh ka MLA jong ka East Shillong constituency kong Ampareen Lyngdoh hynne ka sngi Thohdieng, kala bthah iaka tnat Pulit ban tohkit halor ka jingshah thang ki kali hapoh la Laitumkhrah Police Station bad ka jingiakajia ki ar kynhun ha jan ka ophis DHS Shillong.
Hynne ka step ka kong Ampareen kala leit jurip iaka Laitumkhrah Police Station hadien ba ki paidhur kila thaw ka jingkulmar bad kila wiang ding iaki kali kiba pynieng hapoh ka phyllaw jong katei ka Thanat.
Haba kren sha ki lad pathai khubor ka kong Ampareen kala ong ba kum kine ki jingjia ym lah ban pdiang bad kala iathuh ba kala bthah iaka tnat Pulit ban tohkit bniah naduh ka jingiakajia hapdeng ki ar kynhun kaba la poi shaduh u pud ban wiang ding iaki kali kiba ieng ha phyllaw jong ka Thanat.
Ka kong Ampareen kala ong ba katkum ka jingiathuh ki bor Pulit, ka jingjia kala sdang shwa namar ka jingiakynnad hapdeng ki ar kynhun tang namar ka jingshah pakhang lynti jong kawei ka kynhun ha kawei ka kynhun ban iaid na kawei ka lynti.
“Ka Laitumkhrah kadei ka shnong kaba tip ain bad nga la bthah iaki bor Pulit ban nym shah iano iano ruh ban shim lane ban bat iaka ain ha kti bad nga la bthah ruh iaki Pulit ban tohkit bniah halor kine baroh artylli ki jingjia” la ong ka kong Ampareen.
Ka kong Ampareen kala ong ba kum ia kine ki jingjia ym dei pynlong ka jingiakynnad iapher jingmut bad naka liang ka tnat Pulit kan tohkit ia baroh kiba kynnoh shah shoh ne kiba donkti ban shoh briew ban tip bniah halor ka jingjia kaba la poi haduh u pud ban thang iaki kali.
“Wat pynkylla jingiakynnad iapher jaidbynriew namar kum ka MLA ba tip briew, nga ong ba kadei ka jingiakren por mynmiet bad haka por bym ia biang khlieh” kala ong.
Pule lang ia kane: Dep ithuh ki Pulit ia ki briew ba wiang ding ia ki kali ha Laitumkhrah Police Station
