Shillong, Naiwieng 21 : Ka Iingkashari Meghalaya High Court ha ka sngi Palei, kala bthah ia ka Sorkar Jylla ban khein beain noh ia ka jingshna, jingpyniaid iew bad jingpyndonkam ia ki plastic ba duna ia ka 120 micron hapoh ka Jylla.
Ha ka hukum ba pynmih haba bishar ia ka PIL halor kane ka kam, ka Iingkashari ba kynthup ia u Chief Justice India Prasanna Mukherji bad Justice W Diengdoh kila ong “ Tad haduh da don da kiwei pat ki jingdong ban bujli syndon ia ka jingpyndonkam plastic ha ki iew, ka Sorkar la bthah ban bud ia kine ki policy : (i) ban pynmih ia ka administrative order lane wanrah ia ka ain ban khang noh syndon ia ka jingshna, jingpyniaid iew bad pyndonkam ia ki plastic ba duna ia ka 120 micron width.
(ii) ban kurup noh ia ki plastic kiba duna ia ka 120 micron width na ki nongshna plastic, nongshalan plastics bad ki nongpyndonkam plastic,
(iii) ban shim ia ki sienjam kiba treikam khnang ban lah tehlakam bha ia ka jingbret ia ki plastic hapoh ka por ba lyngkot bad (iv) ban leit jurip ia ki jaka paidbah bad ban tam ia kine ki plastic bad phah ia ki sha ka waste management.”.
Ka PIL kala kyrpad ia ka Iingkashari ban pynmih ia ka hukum ha kaban khang syndon ia ka jingpyndonkam plastic hapoh ka Jylla Meghalaya.
“Haba pdiang ia ka writ petition ha ka 16 tarik Nailar, 2024, kane ka Iingkashari bala pyniaid da u Chief Justice barim, kala hukum ia ka Sorkar Meghalaya ban shim ia ki sienjam ha kaban khang pura syndon ia ki mar plastic hapoh ka Jylla. Ngi pynshisha na kane ka hukum ba kat haduh ka por bala shem ia kawei pat ka mar ka ban bujli ia ka plastic bad ka ban I jingshakri kumjuh kumba long ka plastic mynta, ka Sorkar ka dei ban shim ia ki sienjam ban pyrrkhing ia ka jingpyndonkam ia kito ki mar plastic” ong ka Iingkashari.
Kala ong ba ka affidavit jong u Secretary in-charge ka Tnad Forest & Environment ha ka 30 tarik Nailur, 2024, kala pynpaw ia ki sienjam bala shim da ka Tnad kat kum kane ka hukum.
Kala paw na kane ka kaiphod ba ka Sorkar kala wanrah ia ka policy kumno ban bret ia ki jaboh plastic bad ruh ia ki sienjam ba kala shim ban kurup ia ki jingbuh tiar (container) ba shna da ki plastic bad kiwei kiwei ki mar.
“Haba pdiang ia ka kaiphod jong ka Sorkar, ngi don ka jingsngew ba ngi dei ban aipor sha ki ba kin pyntreikam pura ia ka hukum” bynrap ka Iingkasahri.
