Ba kam ba ym don jingkhein ia ka jingkhaii tuh ia u dewiong ha Jylla
Shillong, Nailar 07 : Ka Iingkashari Meghalaya High Court ha ka sngi Nyngkong, kala bthah ia u Secretary ka Tnad Transport ban file da ka affidavit hapoh k alai taiew halor ka jingkam ba kam don jingthoh ne jingkhein halor ka jingkynnoh khaii tuh ia u dewiong hapoh ka Jylla.
“Ka Sorkar kan hap jubab halor ki jingkynnoh bala kdew ha ka jingujor da kaba file affidavit lyngba u Secretary ka Tnad Transport. Ia kane ka affidavit dei ban file hapoh ka lai taiew naduh mynta ka sngi” ong ka Iingkashari Division Bench ha ka hukum bala pynmih haba bishar ia ka PIL bala mudui da u Champer M Sangma.
Kane ka dei kawei pat ka ujor bala mudui na ka bynta ka jingmyntoi u paidbah da u nongmudui ba iadei bad ka jingtih dewiong beain bad khaii beain ia u dewiong hapoh ka Jylla.
U Nongmudui ula phaikhmat eh halor kaei kaba la kynnoh ba ka jingbym biang ki jingthoh jingtar ban sakhi ia ka jingia donbynta lang jong ka Sorkar bad ki briew kiba kwah ban khaii ia u dewiong bat uh beain hapoh ka Jylla da kaba kam ba u dei uba la tih na kiwei pat ki jaka.
U Nongmudui ula ong ba kawei na ki kompani Jaima Cial Pvt Limited ba hakhmat eh, ka dei kaba iadonkti ha ka jingtih dewiong beain ha kaba briew uba pyniaid ia kane ka kompani ula don ruh ia kawei ka kompani bala tip kyrteng ka Vaishnoi Dev Traders Pvt Limited, ka kyrteng kaba la mih wat ha ka jingmudui kaba rim, ha kaba lyngba jong ka, la pyniaid ia ka jingkhaii tuh ia u dewiong.
Kat kum ka jingong u nongmudui, ki don palat 440 tylli ki trok kiba don bynta ha ka jingkit ia palat 5340 metric ton u dewiong na East Jaintia Hills hynrei ka jingkylli bala pan lyngba ka Right To Information Act 2005, ka pynpaw ba ym shym la don jingthoh satia kaba kum kane bad ki bor Sorkar.
U Nongmudui ula kam ba kat kum ki lynti ka ain, ka Sorkar Jylla kala dei ban buh ia ki jingthoh ne jingkhein bad ka dei ruh ban hap ai ia ka jingtip haba don ba pan.
U Nongmudui ula kam ruh ba kine ki trok kila dei ban ngat ha ka jingshah thew ka mar ha ka lynti iaid jong ka, kaba long la kumno kumno ruh ha kawei na ki weighbridge shuwa ban ailad ba kin iaid bad kine ki weighbridge kila dei ruh ban buh jingthoh ia kum kine ki trok.
Ka Iingkashari kala bthah ba ia ka copy jong ka mudui la dei ban phah sha ki nongshah mudui no 6,7 bad 8 ha ryngkat ka jingbthah ba kin file ia ki affidavit halor kane ka kam ka ban sa wanrah biang sha ka jingbishar hadien ka lai taiew.
Pule ruh: Kitbot ka skul HK Singh ia ka kynhun ialehkai phutbok ban iakhun ia ka U-14 Subroto Cup
