Shillong, Naitung 01: Ka Iingkashari Meghalaya High Court kala bthah ia ka Sorkar Jylla ban wanrah noh da ka ropeway bad kiwei kiwei ki lad ha ka leit ka wan khnang ban lah tem ia ka jingdheng kali ha Nongbah Shillong.
“Ka Jylla ka lah ruh ban mynjur ban shna noh da ki ropeway ne kino kino ki lad ha ka leit ka wan kat kaba lah bad kat kum ka jingioh pisa” ong ka Iingkashari ki arngut ki Nongbishar ha ka hukum bala pynmih haba shong bishar ia ka PIL hynne ka sngi thohdieng.
U Advocate General ula pyntip ba ka Sorkar Jylla kala thung ia ka kynhun ki riew shemphang na bar Ri ban wad ia ki lad ki lynti halor kane ka jingeh bad kane ka kynhun kala dep phah ia ka kaiphod, ia kaba ka Sorkar ka dang bishar ban leh ia kaba donkam.
Ula pyntip baka Sorkar kala khot tender ban thied ia ki mini bus khnang ba yn pyndonkam ha kaban kit ia ki khynnah skul khlem da pyndonkam shuh ia ki kali shimet ban leit buh ne shaw skul.
Ka Iingkashari ka ong ba kala shem ba ki don bun ki bus kiba ju pyndonkam baroh shikatta ban kamai ha Shillong kiba la shu pynieng ha kylleng ki jaka bad ki bym I long shuh ban maramot.
Halor kane, u Advocate General ula kular hakhmat ka Iingkashari b aka Sorkar kan sa shim ia ki sienjam ha kaban lilam noh ia kine ki bos kat kum ka ain khnang baka Jylla kan ioh pisa ha kaban thied ia ki bos rit ban kamai ha Nongbah.
U pyntip b aka Sorkar Jylla kala dep phah ruh ia ka jingtyrwa sha ka World Bank ba kan bei ia 21 tylli ki bos elektrik ba kin iiad hapoh ka Nongbah Shillong.
Ka jingai jingmut kala mih ruh na kiwei ki liang mamla b aka bor Sorkar ka dei ruh ban pynbun ia ki jaka pynieng kali ha ki jaka ba idonkam khnang ban khang ia ka jingpynieng kali ha ki surok kiba la khim lypa.
