Imphal, Nailar 09 : Haduh kumba 700 tylli ki trok ki ba kit ia ki mar ba kongsan ki la sahkut ha ka surok National Highway-2 (Imphal-Dimapur) hynnin ka sngi Nyngkong, kata hapdeng ka jingiakynad namar ka jingpakhang surok ba la khot pynlong da ka All-Tribal Student Union Manipur (ATSUM) naduh ka sngi Thohdieng ba la lah.
Ki bor pulit ki la ong ba watla ki don katto katne ki jingjia thang kali ha ka sngi Saitjain bad ka sngi U Blei ba la lah, hynrei kam shym la don kano kano ka jingjia haduh hynnin ka sngi Nyngkong.
“Haduh 510 tylli ki kali kit mar ia ki ba la synran da ki bor pahara ki la lah ban poi sha ki jaka ba ki dei ban leit tad haduh kane ka janmiet sngi Nyngkong ba la lah, hynrei haduh palat 700 tylli kiwei pat ki trok ki ba kit ia ki mar ba kongsan ki la sahkut hapoh ka surok National Highway-2,” ong u heh pulit.
Ka ATSUM ka la khot pynlong da ka jingpakhang ia ki kali kit mar naduh ka sngi Thohdieng ba la lah ban dawa ba ia ka Manipur (hill regions) Autonomous District Council (Amendment) Bill, 2021 dei ban wanrah hapoh ka iingdorbar thaw ain na ka bynta ban aibor shuh shuh ha ki kam synshar khadar ia ki autonomous council jong ki trai shnong.
Na ka liang ka sorkar Manipur hadien ki jingialang ki ba bteng naduh ka sngi U Blei haduh hynnin ka sngi Nynkong bad hynne ka sngi ka la poi sha ka jingiamynjur bad ki nongialam ka ATSUM ki ba khot pynlong ia kane ka jingiakhih.
Hadien ka jingiasoi ia ka jingiamynjur, ka sorkar Manipur ka la pyllait noh ia baroh san ngut ki nongialam ka ATSUM ki ba la shah set naduh ka 2 tarik mynta u bnai.
“Ia ki san ngut ki nongialam ka ATSUM yn pyllait noh hadien ba ki la weng noh ia kane ka jingpakhang surok khlem kino kino ki jingpynngat kyndon,” ong ka jingthoh ba la ia mynjur.
Ia mynta hi ka sorkar Manipur ka la khang ia ki kor internet na ka bynta san sngi kynthih ha baroh kawei ka jylla naduh ka ba kut jong ka taiew ba la lah.
Na ka liang ki bor pulit ki la ong ba naduh ka sngi Thohdieng ba la lah, haduh palat 1,200 tylli ki trok ki ba kit ia ki mar ba kongsan ki la sahkut hapoh ka surok National Highway-2, ka ba pyniasoh ia ka Manipur bad kiwei pat ki bynta jong ka ri lyngba ka Nagaland.
Haduh kumba 30 ngut ki samla pule trai shnong ki la ngat ha ki jingmynsaw na ka jingiakynad ha kane ka ba kut taiew, kata hadien ba ki bor pulit ki la pynsangeh ia ka jingiakhih jong ki ka ba la pynmih ia ka jingialeh markylliang.
