Guwahati, Nailar 18 :Ha kawei ka jingjia ka ba pynkyndit uwei napdeng ki runar u ba la lait phet dang shen na na kti jong ki pulit ha Dhakuakhana hapoh Lakhimpur district ka Assam u la shah bom iap ha ki paidbah ki ba don hapdeng ka jingbitar hynne ka step sngi Palei.
Katkum ki khubor la iathuh ba une u briew ba la shah pyniap ia u ba la tip kyrteng kum u Gerejai ba ju khot u Raju Baruah u la lait phet na ka kashari jong u Magistrate ha kane ka sngi ba Ar ba la lah.
Hynrei, na ka liang ki paidbah ka thain ki la ioh bat ia une u runar najan ka wah Kilkili hynne ka step sngi Palei bad thombor ia u ha ban da jem jai hashwa ban aiti noh sha ki bor pulit hapdeng ka jingmynsaw ka ba jur.
Hadien ba ki bor pulit ki la pynkit shapoh ka hospital, na ka liang ki doktor ki la pynbna ba u la dep khlad.U Gerejai la iathuh ba u la lait phet na ka jingkhmih jong ki pulit ha ka sien ka ba ar hapoh ka shi snem, hynrei ha kane ka kynti ka ba mynta u la ngat syndon ha ka jingiap.
Ha ka ba nyngkong une u runar u la lait phet napoh ka hospital ha Lakhimpur kata watla u dang ngat ha ka jingmynsaw na ka jingdei kuli na ki bynta jong ka kjat.Une u briew u la shah kynnoh donkti ha ki ba bun ki kam pyntriem ka ba kynthup ha ki kam leh beijot bad pyniap briew.
Ha kawei pat ka bynta, ki arngut kiwei pat ki runar ia ki ba la tip kyrteng kum u Jatin Tamuli bad u Sunti Das mynta ki dang don hapdeng ka jingphet rieh.
Kham hashwa, kata ha u bnai Naitung ba la dep ka jingkhihwin halor ka jingshah thang im jong uwei u briew ha ki katto katne ki nongshong shnong ki ba la tep noh ia ka met jong u ha ka shnong Borlalungaon ka la pynlong ia ki bor pulit ba kin kem noh ia san ngut ki briew ka ba kynthup ia laingut ki kynthei.
Ki bor pulit ka Samaguri hapoh ka jingialam u SDPO ka Kaliabor uMrinmoy Das ki la kem noh ia san ngut ki briew ka ba kynthup ia laingut ki kynthei hynnin ka miet sngi Balang ha ka ba iadei bad katei ka jingshah pyniap ha u paidbah.Ki bor pulit ki la lapdien ruh ia kawei ka met iap jong utei u lanot.
Ki tyllong khubor ki la kam bad ki pulit ki la lapdien ia katei ka metiap ha ka por shiteng synia jong ka sngi Saitjain ba la lah bad pynkynriah noh ia ka shapoh Nagaon BP Civil Hospital na ka bynta ban leh ia ka postmortem.
La ong ba ka jinging ding jong utei u briew na ka jingshah thang ka long haduh 90 percent.Kitei ki briew ki ba la shah kem ki kynthup ia u Nareswar Bordoloi, Ratneswar Bordoloi, ka Bharati Bordoloi, Padumi Bordoloi bad ka Barsha Rani Bordoloi ki ba dei na ka shnong Borlalungaon village, ong shuh shuh ka tyllong khubor pulit.
Ki tyllong khubor ki la ong ba katei ka kam thombor ba shyrkhei ka don ia ka jingiadei halor ka jingiap ka ba pynartatien jong kawei ka kynthei ka ba dang shu dep iathoh shongkurim ka ba kyrteng ka Sabita Pator.Ia ka metiap jong kane ka briew la lapdien hajan kawei ka pung ha kane ka taiew ba la lah, bad na ka liang ki nongshong shnong ki la tharai ba ka la iap namar ka jinghap hapoh kane ka pung.
