Nongstoiñ, Nailar 19 : Ki paid nongshongshnong ka shnong Nongtrai Sepngi ha ka sngi Ba-ar kila iamih paidbah ban pyn paw ia ka jingbitar halor ka jingjot rathai ka surok Pradhan Mantri Gramsadak Yojana (PMGSY) ba 5 Km na Langdongdai, kaba dang shu dep pyntrei dang ha u snem 2022, kaba long laisnem kynthih.
Kat kum ka jingiathuh ki nongshongshnong ka thain, ia kane ka surok la pyntrei da u BK Agarwal ba na Assam, ha kaba kila kynnoh ba une u contractor ula shu pyntrei torti ia ka surok haduh ba don ki bynta jong ka surok ba ki kynroh ruh kila khyllem bad twa.
U Nongthoh khubor ha ka jingjurip dang shen la lap ba ka jingpyntrei ia katei ka surok kam long satia kaba la trei bha bad kam don satia wat ki nala kiba dei ban don.
U bah Gardening Rongrin uwei na ki riew rangbah ka thaiñ ryngkat bad ki sordar jong ka shnong Mawsmai, Langdongdai, Porshken, Mawguru, Porïu bad kiwei kiwei ki shnong jong ka thaiñ Nongtrai sepngi, ki la ong ba u B.K.Agarwal u dei u kontraktor u ba ka sorkar jylla ka ju ai ïa ki jingtrei kiba heh man la ka por, wat la ki jingtrei ki long kiba ihun bad ha ka thaiñ Nongtrai u la ïoh ban pyntrei surok haduh lai sien.
Ka sien ba nyngkong ka dei ka jingpynbha bad siang rong ïa ka surok na Athiabari haduh Riangdo ha u snem 2008-09, hynrei la kynnoh ba tang hadien shi snem katei ka surok ka la jot la pra bad ha u snem 2014-15 ka sorkar ka la mang pisa ban shna noh da ka intermediate lane bad utei u juh u kontraktor, u la ïoh ban pyntrei biang ïa katei ka surok. Nalor kata ïa katei ka surok na Langdongdai kaba ïasoh bad ka surok PWD kaba poi haduh Malangkona ruh utei u juh u kontraktor u ba pyntrei.
Kitei ki rangbah ki la kynnoh ba imat ki heh jong ka sorkar ki la ïoh mluh na utei u kontraktor, lymda kumta kumno u shu ïoh jingtrei man la ka por haba kiwei ki kontraktor kiba kwah jingtrei ki don da ki hajar ngut.
Ha kajuh ka por ki la ong ba katkum ki kyndon ba ka sorkar ka la thoh ha ki sign board kiba la pynïeng ha ka jaka ba katei ka surok PMGSY ka ïatyngkhuh bad ka surok PWD, la kdew shai ba hapoh san snem naduh ba la pyndep ka surok ka dang hap hapoh ka jingpeit bad khmih jong u kontraktor bad ka por ba utei u kontraktor u dang hap ban peit ka kut haduh u snem 2027.
La kdew shai ruh ha ka sign board ba ka la mang ruh shiphew lak tyngka na ka bynta shi snem ban phah pynkhuid ïa baroh arliang ka surok, ban maramot ïa ki bynta ba jot bad pynbiang ïa ki nala um khnang ba ka surok kan neh, hynrei utei u kontraktor um shym la leh satia kumba la btah da ka sorkar.
Kitei ki rangbah shnong ki la ong ruh ba dei halor katei ka nongrim ba ka surok ka jot ka pra bad ki la dawa na ka sorkar ba ka dei ban hukum ïa u Agarwal, ba u dei ban maramot bad pynbiang noh ïa ki nala um, phah prat bad pynkhuid noh ïa baroh arliang surok, namar katei ka surok ka dei u budlum ka ïoh ka kot, ka khaïi ka pateng jong baroh ki nongshong shnong ka thaiñ Nongtrai sepngi.
Haba kdew halor ki jingeh na ka jing sniew palat liam jong katei ka surok, ki la ong ba la bun sien wat ki jingïatyngkhuh kali ki jia ha katei ka surok namar la tap da ki sañium baroh arliang surok.
Kitei ki rangbah ki la ther tyngeh ruh ïa u bah R.G.Momin MLA ka thaiñ, ha kaba ki la ong ba ki la ïoh jingtip ba ha kiwei ki jaka jong ka constituency, u ju kren kop da kaba ong ba ki surok ha ka thaiñ jong u ki la biang lut. Hynrei na ïing jong u haduh ka bynta ba katei ka surok PMGSY ka sdang ka jngai tang kumba saw haduh san kilomitar pynban um ïohi.
Nalor kata ki la ong ruh ba ha ka por ba um pat shah jied kum u MLA u dang long kum u Sub Inspector of School jong ka West Khasi Hills, haba u wan sha shnong da ka scooty u ïaid lyngba katei ka surok bad u ju ong ruh ha ki paitbah, ba lada u shah jied kum u MLA katei ka surok ka dei ka mat ba kongsan tam kaba u la buh thong hynrei ynda u la jop pat de um ju wan ïaid shuh na katei ka surok.
 ba 5 Km na Langdongdai, kaba dang shu dep pyntrei dang ha u snem 2022, kaba long laisnem kynthih.){kind=link}