Shillong, Nailar 19 : U MLA ka North Shillong Bah Adelbert Nongrum, ha ka sngi Ba-ar, ula pynbna ban ai buskit da ka song pisa ba T.20,000 ia ki briew kiba iohkem bad T.10,000 ia kiba ai jingtip ba thikna shaphang ki riewsniew kiba dung nar injek ia ka khynnah skul hajan Madan Student, Jaiaw Pdeng.
U Bah Adelbert ula pynbna ia kane hadien ka jingwan jngoh ia kane ka khynnah kaba dang don hapdeng ka jingshah sumar ha Dr H Gordon Robert Hospital, hadien ka jingshah dung nar injek ha ka janmiet sngi Nyngkong.
“Nga sngewkthang ka mynsiem halor ka jingshah dung nar injek kane ka Khynnah kynthei kaba shong ba sah hapoh ka Constituency jong nga. Kum kine ki jingjia kim pat ju jia koit ha kane ka Jaidbynriew kaba tipbriew tipblei ne tipkur tip kha” ong u Bah Adelbert.
“Ban shu sngap jar halor kane ka jingjia ka long kaba ma shisha, namar ki ju ong, ba ka jingsngap ka dei ka jingmynjur bad ka jingsngap jar ka dei ka jingleh kam siew kaba shyrkhei. Kumta nga khot ia baroh ki nongshongshnong ban iashimbynta kang ha kaban iawad ia kine ki runar, ym dei shuh tang ki Pulit, ym dei shuh tang ka Sorkar, ym dei shuh tang ki sengbhalang hynrei baroh ki dei ban pyrshang la ka bynta” ula bynrap
U Bah Adelbert ula ong ba tang ka jingpynrem ia kine ki kam sniew kam pat long satia kaba biang hynrei la donkam ban leh eiei khnang ba kan long ka nuksa ia kiwei.
“Kum kine ki jingjia kila jia ha kiwei ki bynta jong ka Ri India…kila jia ha kiwei ki bynta jong ka pyrthei bad mynta kila sdang ban wan jia hangne. Kane ka dei ka jingbud tynneng jong ki ksew laitlan, ksew daitbriew bad nga sngew ba kane kan ym biang tang da ka jingpynrem bad kum u MLA ngan hap ban buddien ia kane kakam” ula ong.
Une u MLA ula kyntu ia ki Pulit ba ki dei ban leit iaid pahara noh ha kylleng ki jaka jong ka constituency bad lada ki lap ia kino kino ki briew kiba shong ha ki jaka kiba dum bad ha kyndong kynshrot, ki dei ban bat bad kylli jingkylli ia ki.
