Ka jingpynlut ka Meghalaya ha ka koit ka khiah ka dei kaba hehduh hapoh ka Ri
Shillong, K’lyngkot 16 : U Myntri Rangbah ka Jylla Conrad K Sangma hynne ka sngi Palei, ula plie paidbah ia ka Rural Health Centre ha Myriaw, Eastern West Khasi Hills District ha ka jingiadonlang u Myntri kam ialehkai Bah Shakliar Warjri bad u MP ka Rajya Sabha Dr WR Kharlukhi.
Haba ai jingkren ha ka jingialang, u Myntri Rangbah ula ong ba ka kam ka koit ka khiah ka dei kawei na ki kam ba bun bha ki jingtynjuh hapoh ka Jylla haba kdew ia ka jingkylla bala wanrah ha ka jingtei ia ki jaka sumar ha kine ki 7 snem ban pynlong ia ki jaka sumar kiba poi sha ki nongshongshnong ba sah sha ki jaka kyndong.
Haba kynthoh ba ka Sorkar Jylla kala jingkut jingmut ban pynkylla ia ka Tnad ka koit ka khiah da ka jingai ia ka mang tyngka kaba hehduh ba kot haduh 9%, bad dei kaba hehduh hapoh ka Ri, ula ong ba kane ka phalang ia ka jingkut jingmut ba shisha jong ka Sorkar.
Ia kane ka Rural Health Centre (RHC) la bei tyngka da ka CMSDF ha ka jingpynlut ba kot T.38.8 lak.
Ka Myriaw RHC kan kdup ia 21 tylli ki Shnong bad yn pyniaid ia ka da ka Dr HG Robert Hospita, Shillong. Kane ka RHC ka dei kaba saw ban pyniaid da kane ka Hospital hapoh ka Jylla.
Haba ban jur ia ka bor jong ka jingiatreilang, u Myntri Rangbah ula ong ba katba ka Sorkar ka dang trei ia ka kam, ka jing kyrshan na ki shnong ki thaw bad ki seng kum ka Dr HG Robert Hospital, Shillong kan nang ai mynsiem ia ka jingiatylli ban lah pynpoi ia ki lad jingsumar ha baroh kawei ka Jylla.
