Nongstoin, Naitung 10 : Ka Khasi Students’ Union (KSU)-West Khasi Hills kala pynphai biang sha la ki jong ki Jylla, ia kumba 50 ngut ki bar jylla kiba nongwan trei bylla ha kylleng ki jaka hapoh ka District khlem ki kot ki sla kiba biang.
Kiba bun na kine ki nongbylla ki dei kiba trei ha ki artylli ki karkhana sain nar ha Riwiang bad kumjuh ruh kiba wan trei bylla ha ka thain Nongstoin bad ha Mairang, Eastern West Khasi Hills.
Kane ka jingbeh nongbylla bar jylla ba beain, kala jia ha ka jingkhynra Work Permit bad Labour Licence jong ka Seng kaba la pynlong kum shibynta ban tynjuh ia ka Sorkar namar ka jingpynslem ban pyntreikam ia ka Inner Line Permit (ILP) bad ka Meghalaya Resident Safety & Security Act (MRSSA).
Ha kane ka jingkhynra, ka Seng kala lap ba kine ki bar jylla kim don satia ia ki kot ki sla kiba biang ban pynthikna ba ki dei ki nong India.
Halor kane ka jingshem, kane ka Seng ki samla pule, kala beh ia kine ki bar jylla ba kin leit phai noh shala ki jong ki shnong.
Ha kajuh ka por, ka KSU kala maham ia ki nongwan ialam ia ki nongbylla bar jylla ba kim dei ban ialeh pyrshah ia ka Ain lem kumta kin hap shim ia ka jingkitkhlieh lada jia kano kano ka jingjia.
Ka KSU kala pyntip ba kane ka jingkhynra kan dang iai bteng ha kylleng ki jaka jong ka District, ha kine ki sngi ban dang wan.
