Shillong, Rymphang 11: Ka Khasi Students’ Union (KSU) Mawkhar Circle hynne ka sngi ka la phah leit phai ia ki nongbylla sngi bar Jylla halor ka jingkynnoh ba kila wan trei khlem ki kot ki sla kiba biang ha Umsohsun, East Khasi Hills.
Ha ka jingkhynra bad beh iaki nongbylla bar Jylla na Umsohsun, ki Pulit ki la wan ban khanglad bad kane kala wanrah ka jingiatainai kaba jur hapdeng ki dkhot ka KSU bad ki Pulit.
Ka KSU ka la kynnoh ba kitei ki nongbylla bar Jylla ki ju dih kyiad bad thaw jingkulmar ha katei ka jaka ha ka por janmiet ka ba pynthut ia ka leit ka wan jong ki paidbah kiba iaid lyngba ka Umsohsun.
Ka KSU ka buh jingkylli ia ka bor pulit bad kynnoh ba kim shym la leh eiei pyrshah ia kine ki nongbylla bar jylla kiba pynwit iaka iaid ka ieng ki paidbah ha katei ka thain.
“Ha kine ki khyndiat bnai ba la dep, ki paidbah ki la ujor shaka seng ba kitei ki juh ki nongbylla bar jylla kiba sah hangtei ki ju pynthut ia ka leit ka ieng jong ki paidbah kiba ïaid na Umsohsun ynda kila buaid” la kynnoh ka KSU.
