Shillong, Jylliew 09: Ki Sengbhalang ka War Jaintia kila ioh bat ia palat 200 tylli ki trok shalan mar na shabar ka Jylla, kiba kamai khlem ki kot ki sla kiba biang bad la pynphai biang ïaki shaki jaka ba ki wan.
Ia kine ki trok la bat da ka Khasi Students Union (KSU) West Jaintia, War Jaintia Circle bad ka Federation of Khasi Jaintia and Garo People (FKJGP) West Jaintia Hills ha ka jingleit jurip lang ha War Jaintia ha ka sngi Balang.
“Ha ka jingleit jurip ngi la lap palat 200 tylli ki trok nabar ka Jylla kiba kamai khlem ki kot ki sla kynthup ruh ïa ki trading licence bad kiwei kiwei ki kot kiba donkam. Hadien ba la lap ïa kine ki trok ba kamai beaiñ, ngi la phah biang mar mar ïa ki sha ki jaka ba ki wan,” ong kine ki seng ha ka kyrwoh.
U President ka KSU West Jaintia Hills u Samla Laitphar Syngkrem u la ong ba ka jingwan rung khlem da peitngor jong ki briew kiba nabar ka ktah ia ka kamai kajih jong ki trai shnong bad u la maham ruh ia ki trai par maw bad ki nongkhaii dewiong ban ym ai kam ia ki nongtrei khlem da pynbiang ki kot ki sla.
“Lada jia eiei ia kine ki briew kiba nabar, kito kiba wanrah kin hap ban shim ia ka jingkitkhlieh”, u la ong.
U la pynpaw ruh ia ka jingsngewkhia halor ka jingpynslem ban pyntreikam ia ka Inner Line Permit bad pynskhem ba ka seng kan shim ia la ki jong ki sienjam ban tehlakam ia ka jingwan rung tuh ki bar Jylla.
U General Secretary ka FKJGP West Jaiñtia Hills Samla Nangkhraw Rani u la kynthoh ïa ka Jaiñtia Hills Autonomous District Council halor ka jingbym lah ban pynbeit ryntih ïa ki trok kiba wan na shabar ka Jylla katkum ki ain ka District Council.
“Kine ki trok ym tang ba ki wan ban leh kam khaii khlem ki kot ki sla, hynrei ki pynduh pynduh kamai ia ki nongniah trok trai Jylla bad ia ka kamai kajih jong ki”, la ong u
