Shillong, Nohprah 04: U Nongialam ka Liang Pyrshah u Dr Mukul Sangma hynne ka sngi Blang ula ban jur ia ka jingdonkam ban pynkhlain ia ka rukom treikam ka tnad Pulit bad ki Pulit ha ka Jylla katkum ki kyndon aiñ.
U Dr Mukul Sangma ula pynsngew ia kane ha ka jingïalang jong ka State Security Commission kaba khlieh da u Myntri Rangbah ka Jylla, ha ka jingdon lang u Symbud Myntri Rangbah ba khmih iaka tnat kam pohing (Police) bad ka Director General of Police (DGP).
Haba kren sha ki lad pathai khubor u Dr Mukul u la ong, ba ha ka jingïalang, kala don ka jingiathir sani halor ka jingdonkam ban pyndonkam hok ia ki jingdon jingem bad ka bor jong ki Pulit kumba la bthah ha ka Meghalaya State Police Act 2010.
U Dr Mukul ula ïathuh ba ki don shibun ki mat jingïakren ha ka State Security Commission hynrei kaba kham kongsan kadei, kumno ban pynkhlain iaka tnad pulit katkum ki kyndon aiñ, ban wanrah ka jingshongshngain bad ban tem ia ki kam sniew hapoh ka Jylla.
“Watla ka thong kadei ban pynkhlain iaka rukom treikam ki Pulit katkum ka aiñ hynrei ki don beit ki maw jynthut kiba wan kum ka jingshah ïalam bakla ha ki bor ba halor, la kadei na ka liang ki sengsain pyrthei, ki kynhun nongkhaïï, ki briew kiba don ha ka Sorkar” la ong u Dr Mukul.
Ula ong ba ki paidbah ki hap long kiba husiar bad ka Sorkar kadei ban shimkhia ban pynthikna ba ka rukom treikam ki Pulit hapoh ka Jylla kadei ban long katkum ki kyndon aiñ.
“Ngi la ïakren sani bha ruh halor ka jingioh sngew ba ka don ka jingpyndonkam bakla iaka bor da ki Pulit kumba la sakhi ha South Garo Hills bad South West Garo Hills ha kaba ki ophisar kila pyndonkam ia ka bor bala bynshet ha ki” u la iathuh.
U Nongialam ka Liang Pyrshah ula ïathuh ba ula ai jingmut ha ka State Security Commission ban pynthikna ba ka jingthep kam Pulit kam dei ban slem khnang ban pyndap iaki kam ba lait, khnang ban pynkhlain ia ki kam kumba la bynshet katkum ki kyndon aiñ.
U Dr Mukul ula kam ba bun ki Police Station, ki Police Outpost bad kiwei ki Ophis ka tnat Pulit ki duna nongtrei bad kane kadei kawei na ki daw ba tlot ka rukom treikam ka tnad.
“Na ka 100%, bun ki Police Station, ki Police Outpost bad kiwei ki Ophis ka tnat Pulit ki don briew bad ki treikam 50%-60% ka jingdon briew kane ka pyntlot iaka rukom treikam bad ia kane la sakhi lyngba ka jingshah thombor ki katto katne ki Police Station ha Rilum Khasi-Jaintia” ula ong.
Ula ïathuh ba ula ai jingmut ha ka jingïalang jong ka State Security Commission ba ka jingthung kam Pulit kan dei ban long man u snem namar bun ki kam ki thylli, namar don ki Pulit kiba la kiew kyrdan bad kiba la shongthait na ka kam.
“Ngam ong ban thaw kam thymmai hynrei donkam ban pyndap ia ki kam bala don lypa bad kiba lait thylli da kaba thepkam thymmai namar kane kan pyni ia ka jingkhlain ka rukom treikam ka tnad Pulit bad kan kyntiew ruh ia ka lad ioh kam ki samla khamtam kito kiba kwah ban shakri paidbah, lyngba ka kam Pulit” ula bynrap
