Shillong, Nohprah 04: Balei ngan leit phai sha ka seng Congress, haba kane ka juh ka seng ka iatreilang bad ka National People’s Party (NPP) ha Khasi Hills Autonomous District Council (KHADC), kaba ïalam ia ka Sorkar Jylla, kaba nga don hapdeng ka jingiakhun.
Ïa kane la ong da u Nongialam ka AITC u Dr Mukul Sangma bad ula kynnoh ba ka Meghalaya Congress kadei ka seng ka bym beit ha ka lynti iaid.
“Lada ka Meghalaya Congress ka beit haka lynti iaid kan tip, la kan iatreilang ne em bad ka NPP” la ong u Dr Mukul.
Ula kynnoh ba ka Meghalaya Congress ka kren pyrshah beit ia ka NPP hynrei shadien ka ïa don hajuh.
“Nga kum u Dr Mukul Sangma ngan pynkut ïa kane ka jingïalap khana ba ngam leit phai biang sha ka Congress. Ngam lah ban iatreilang bad ki namar nga don ka nongrim kaba skhem ba ngan shakri iaki paidbah bad ban kyntiew ia ka Jylla” ula ong.
U Dr Mukul ula ong ba um donkam ia ka Congress ban shakri ia ki paidbah. “Nga sdang ha ka sain hima kum u kyrtong shimet. Ngam donkam ia ka Congress, nga don ki paidbah kiba don ka jingmut jingpyrkhat ban iakhun na ka bynta ban shakri ia ka Jylla” ula ong.
Haba kylli u Dr Mukul ula kubur ba ka don ka jingïalap khana ba un seng da ka Party thymmai. “Ïa kata ym lah ban kyntait” u la ong.
Haba iadei bad ka jingkylliap lama noh ka AITC Nongthymmai Block ula ong “Kito kiba khylliap lama ba kidei ki riewshimet bad kidei ki briew ki bym kwah ban iakhun namar kata kila pyndem wait noh da kaba khylliap lama”.
