Shillong, Jyllew 01 : Ka Iingkashari Meghalaya High Court kala kyntait ban pdiang ia ka jingpyrshah (objection) bala wanrah halor ka jingpynlong mamla ia ka Meghalaya Lokayukta ha ka mukotduma kynnoh bamsap na ka jingpyntreikam ia ki project kam pynroi jong ka Garo Hills Autonomous District Council (GHADC).
Ha ka hukum bala pynmih ha ka sngi Thohdieng, u Justice W Diengdoh ula ong “Ka jingpyrshah bala pynsngew da ki nongmudui ka dei kabym pdiang satia. Kumta la pynwai noh ia ka MC [WP©] No 199 of 2023 bad MC[WP(C)] No. 208 of 2023 namar ka jingbym don nongrim”.
Ia kane ka ujor la mudui da ka Tnad Home (Political) ka Jylla, DGP, SP ka East Garo Hills, Additional SP bad Withing N Sangma.
U Advocate General ka Jylla ula pynsngew ba ka Lokayukta kum ka bor tian bishar, kam iahap ne ka mamla kaba donkam ban pyniadon bynta ha ka mukotduma namar ka Lokayukta kam hap satia ban iada iala ka jong ka hukum ha kane ka mukotduma.
Hynrei ka Iingkashair kala ong “Khlem da peit ia kiwei pat ki bynta jong kane ka kam, sngewdei ban ong ba shisien bala pynthikna ba ka Lokayukta ka dei ka mamla kaba donkam ha kane ka mukotduma hapoh ka Iingkashari, kiwei ki mat bala pynsngew da ki nongmudui kim long kongsan shuh”
“Namar kata, ka Iingkashari ka sngew ba ka jingdon jong ki nongshah mudui No1 &2 ha ka MC[WP(C)] No. 199 of 2023 bad nongshah mudui ha ka Nos. 2 & 3 ha ka MC[WP(C)] No. 208 of 2023, kata, u Chairperson bad Secretary, Meghalaya Lokayukta, ki long kiba donkam kat kum ki jingbishar kiba iaid ha kane ka kam” kala bynrap.
Lah ban kdew hangne, ki nongmudui hangne kila mudui pyrshah ia ka hukum bala pynmih da u Chairperson, Lokayukta, Meghalaya bala pynmih kat kum ka kyndon 20 jong ka Meghalaya Lokayukta Act, 2014, ha kaba, na ka jingujor jong u riew shimet la kynnoh ba ka don ka jingbamsap bad jingdawa pisa na u nongmudui haba pyntreikam ia ki project jong ka GHADC.
Halor kane, ka Lokayukta kala bthah ia u DGP, Meghalaya ban pynlong ia ka jingtohkit. Kumta, namar ka jingshah ktah ha kum kine ki jingbthah bad kiwei kiwei ki hukum ba pynmih hadien, ki nongmudui kila wan tied ia ka jingkhang jong ka Iingkashari da kaba wanrah ia ka writ petition.
Ka Iingkashari kaong ba ka lah ban kren shngain hangne ba ka jingbishar hapoh ka kyndon 20 jong kane ka Ain (Lokayukta) bala pyniaid da ki nongshah mudui/Lokayukta, ki nongmudui kila ujor da ka writ petition ba pynlong ia u Chairperson bad Secretary, Lokayukta kum ki liang mamla ia kaba mynta la kyrpad ban nym pdiang lyngba ki aplikeshon.
 bala wanrah halor ka jingpynlong mamla ia ka Meghalaya Lokayukta ha ka mukotduma kynnoh bamsap na ka jingpyntreikam ia ki project kam pynroi jong ka Garo Hills Autonomous District Council (GHADC).){kind=link}