Shillong, Jylliew 1: Ka Assam Regimental Centre kala pynlong ia ka passing out parade jong ka batch ba 3 ki shipai Agniveer ha Shillong ha kaba haduh 658 ngut ki shipai kila pyndep ia ki jinghikai pyntbit.
Ia kane ka passing out parade la pynlong ha Parson’s Parade Ground, Happy Valley bad la pynshongkun ia ka da ka jingiadon lang u Brigadier Neelesh Anand Pagulwar, SC, SM, VSM, Commandant, Assam Regimental Centre.
Kane ka passing out parade ka dei ka dak ka jingpyndep ia ki jinghikai pyntbit ki shipai (Agniveer) na ka Training Centre. Kine ki shipai kin shakri ha ki Assam Regiment Unit kiba don kylleng ki jaka.
Palar 2000 ngut ki Kmie Kpa jong kine ki shipai ba dang shu pyndep ia ki jinghikai pyntbit, kila wan ban sakhi ia ka jingrung kam shipai ba pura ki Khun.
